एकल महिलांचा उद्योजक बनण्याचा निर्धार
मालाड, ता. २६ (बातमीदार) ः व्हॅलेंटाइन डेच्या निमित्ताने एकल महिलांच्या सहलीचे आयोजन सोमवारी (ता. १७) सफल विकास वेल्फेअर सोसायटी आणि राष्ट्र सेवा दल, मालवणी आणि काचपाडा यांच्या वतीने मार्वे, मनोरी येथे करण्यात आले होते. या वेळी ४० महिला व त्यांचे कुटुंबीय सहभागी झाले होते. मनोरी किनाऱ्यावर विविध खेळांच्या माध्यमातून या महिलांना सामाजिक एकोपा आणि धार्मिक ऐक्य याबाबत माहिती देण्यात आली. अफवांवर विश्वास न ठेवता त्यांची चाचपणी आणि अफवा कशी ओळखायची याबाबतही माहिती देण्यात आली. त्‍यानंतर एकल महिलांनी समुद्रकिनाऱ्यावर फेरफटका मारत मनसोक्त आनंद लुटला. एकल महिलांनी येत्‍या काळात घरकाम अथवा नोकऱ्यांवर अवलंबून न राहता उद्योजक बनण्याच्या दृष्टीने प्रयत्न करण्याचा निर्धार केला. ज्‍येष्ठ सामाजिक कार्यकर्ते शरद कदम, लालजी कोरी, अनिता खरात आणि प्रदीप खरात यांनी मार्गदर्शन केले. त्यानंतर केक कापून व्हॅलेंटाइन डे साजरा केल्‍याचे सफल विकास वेल्फेअर सोसायटीच्या सचिव वैशाली महाडिक यांनी सांगितले. कार्यक्रम यशस्वी करण्यासाठी सिद्धेश्वरी शर्मा, मेरी चेट्टी, मेघना धनावडे, वीणा धर्माधिकारी, विरंगना साळवे आदींनी मेहनत घेतली.