किन्हवली, ता. २५ (बातमीदार) : शहापूर-डोळखांब रस्त्यावरील वन हद्दीलगत भरदुपारी खासगी वनक्षेत्रात सोमवारी (ता. २४) वणवा लागला होता. या वणव्यामुळे वन संपत्तीचा ऱ्हास होऊ नये, म्हणून वन विभागाची फायर टीम व स्थानिक ग्रामस्थांच्या मदतीने ही आग आटोक्यात आणण्यात आली. यात मोठे वनक्षेत्र वाचवण्यात यश आले आहे.
शहापूर वन विभागातील धसई परिक्षेत्रअंतर्गत आंबेखोर परिमंडळ आणि डोळखांब परिक्षेत्रअंतर्गत गुंडा परिमंडळ या भागातील वनहद्दीलगतच्या खासगी मालकी क्षेत्रात शहापूर-डोळखांब रस्त्याच्या कडेला सोमवारी साडेबारा वाजता वणवा लागल्याची घटना घडली होती. वणव्याने हळूहळू रौद्र रूप धारण केल्याचे लक्षात येताच शेणवे व आंबेखोर परिमंडळातील वनमजूर आंबेखोर, कवटेवाडी, साखरवाडी येथील ग्रामस्थांचे सहकार्य घेऊन धसई कार्यालयातील फायर टीमच्या मदतीने आग आटोक्यात आणण्याचे प्रयत्न युद्धपातळीवर करण्यात आले. दुपारी २ वाजता ४० अंश तापमानातही कडक उन्हात भूक तहान विसरून सलग चार तास अथक परिश्रम घेत विस्तीर्ण गवताळ भागातील आगीवर नियंत्रण मिळवले. या वेळी आंबेखोर व गुंडा परिमंडळाचे वनक्षेत्र वाचवण्यात यश आले. धसई वनपरिक्षेत्र अधिकारी दर्शन ठाकूर यांच्या मार्गदर्शनाखाली गुंडा परिमंडळाचे वनपाल, वनरक्षक, वनमजूर व फायर टीमच्या विजय महादू मुकणे आणि किशोर विठ्ठल वाघ या ‘फायर वॉचरने’ मशीनच्या सहाय्याने आग आटोक्यात आणण्यासाठी मेहनत घेतली. वन कर्मचारी व स्थानिक ग्रामस्थांच्या सतर्कतेमुळे राखीव वनक्षेत्र सुरक्षित राहिल्याने सर्वत्र कौतुक केले जात आहे.

वणवा लागलेल्या भागात दुर्मिळ गोल्डन जॅकल (सोनेरी कोल्हा) याचे दर्शन झाले. वनविभागाच्या त्वरित कारवाईमुळे अशा अनेक वन्यजीवांचा अधिवास वाचला. वनक्षेत्रही सुरक्षित राहिल्याने पर्यावरणाच्या दृष्टीने ही बाब महत्त्वाची आहे. असे वणवे लागून वनसंपत्तीचा ऱ्हास होऊ नये, यासाठी नागरिकांनी दक्षता घ्यावी.
- दर्शन ठाकूर, वन परिक्षेत्राधिकारी, धसई-शहापूर वनविभाग