मुरबाड, ता. २५ (बातमीदार)ः मुरबाड येथून खांडपे येथे जाणाऱ्या एसटी बस स्टेअरिंग रॉड तुटल्याने रस्त्यालगतच्या खदाणीत जाऊन थांबली. बसचालकाच्या प्रसंगावधानामुळे हा अपघात घडण्यापासून टळला असला तरी चौघे प्रवासी जखमी आहेत.
मुरबाड आगारातून खांडपेकडे निघालेल्या बसचा माल्हेड गावाजवळील वळणावर मंगळवारी दुपारी स्टेअरिंगचा रॉड तुटला. हा प्रकार चालक अमोल वाघुलेच्या लक्षात आल्याने त्याने बसवर नियंत्रण मिळवण्याचा प्रयत्न केला. या वेळी बस रस्त्याच्या कडेला असलेल्या खदाणीलगत थांबली. या अपघातात चार ते पाच प्रवासी किरकोळ जखमी असून त्यांना रुग्णालयात उपचाराअंती घरी सोडण्यात आले आहे. या प्रकाराने मुरबाड आगारात मुदत संपत आलेल्या बसचा प्रश्न अधोरेखित झाला आहे. अशातच सुरू असलेल्या काँक्रीटीकरण तसेच रुंदीकरणाच्या कामामुळे प्रवास अधिक धोकादायक झाला आहे. त्यामुळे नवीन बस खरेदीची मागणी होत आहे.