उन्हाळ्यात मुंबईसाठी १,६०० मेगावॉट विजेची सोय
टाटा पॉवर विविध प्रकल्पांतून घेणार वीज; ग्राहकांना दिलासा
सकाळ वृत्तसेवा
मुंबई, ता. २५ : राज्यातील तापमानाचा पारा वाढू लागल्याने विजेच्या मागणीतही वाढ नोंदली जात आहे. त्या पार्श्वभूमीवर टाटा पाॅवरने मुंबईतील आपल्या वीज ग्राहकांना पुरेशी वीज उपलब्ध व्हावी म्हणून कंबर कसली आहे. त्यानुसार जवळपास १,६०० मेगावाॅटपर्यंत वीज उपलब्ध करून दिली जाणार आहे. त्यामुळे ग्राहकांना मोठा दिलासा मिळणार आहे.

मुंबई शहर आणि उपनगरात जवळपास ४५ लाखांहून अधिक वीज ग्राहक असून गेल्या वर्षी उन्हाळ्यात त्यांची तब्बल ४,३०७ मेगावाॅट एवढी विजेची मागणी नोंदली होती. यंदा ती ४,५०० मेगावाॅटपर्यंत जाण्याचा अंदाज आहे. टाटा पाॅवरचे उपनगरात जवळपास आठ लाख वीज ग्राहक असून त्यांची गेल्या उन्हाळ्यात १,०६३ मेगावाॅट एवढी विजेची मागणी वाढली होती; ती यंदा १,१०० मेगावाॅटपर्यंत जाणे अपेक्षित आहे. तरीही आणीबाणीच्या वेळी विजेचा तुटवडा भासू नये म्हणून औष्णिक, जलविद्युत, सौर, पवन अशा वेगवगेळ्या वीज प्रकल्पांतून तब्बल १,६०० मेगावाॅट विजेची व्यवस्था करण्यात आली आहे. तसेच अतिरिक्त २०० मेगावाॅट विजेच्या खरेदीसाठी करार करण्याची प्रक्रिया सुरू असल्याचे टाटा पाॅवरने स्पष्ट केले आहे. त्यामुळे मुंबईतील टाटा पाॅवरच्या वीज ग्राहकांना पुरेशी वीज उपलब्ध होऊ शकणार आहे.

थर्मल स्कॅनिंगद्वारे मॉनिटरिंग
विजेच्या वाढत्या मागणीच्या पार्श्वभूमीवर टाटा पाॅवरकडून विशेष तयारी केली जात आहे. त्यानुसार सर्व ट्रान्स्फॉर्मर, फीडर पिलर्स आणि केबल्सचे थर्मल स्कॅनिंगद्वारे देखरेख करण्यात येत आहे. तसेच सामान्य ऑपरेटिंग पॉइंट्स बदलून लोड ऑप्टिमायझेशन करण्यात येत आहे. सुरक्षितता आणि ऑटोमेशन उपायांमध्ये सुरक्षित कामाच्या ठिकाणी ‘एआय’च्या आधारे सीसीटीव्ही फुटेज विश्लेषण आदींचा समावेश आहे. त्यामुळे तांत्रिक बिघाडाचा सहज शोध घेणे शक्य होणार आहे.