पक्षबांधणीसाठी ठाकरे गटाचे नेते ठाण्यात

सकाळ न्यूज नेटवर्क
मुंबई, ता. २५ : महापालिका निवडणुकांच्या पार्श्वभूमीवर पक्षातील फूट राेखण्यासाठी ठाकरे गटाकडून जोरदार प्रयत्न सुरू आहेत. ठाकरे गटातून शिंदे गटात जाण्याचे प्रमाण अधिक असल्याने आता थेट ठाण्यातच २ मार्चला ठाकरे गटाचे नेते दौरा करणार आहेत. त्याचप्रमाणे उद्धव ठाकरे हे ९ मार्च रोजी मुलुंडमध्ये कार्यकर्त्यांचे शिबिर घेऊन त्यांना मार्गदर्शन करणार आहेत. ठाकरे गटाचे नेते, उपनेते, विभागप्रमुख यांसह अन्य पदाधिकाऱ्यांच्या बैठका मातोश्री तसेच शिवसेना भवन येथे घेण्यात येत आहेत. आगामी निवडणुकांची तयारी तसेच राज्यभरातील पदाधिकारी तसेच कार्यकर्त्यांना उभारी देण्यासाठी शिवसेनेकडून (ठाकरे) रणनीती आखली जात आहे. नेत्यांना राज्यभर दौरा घेऊन पक्ष संघटन मजबूत करण्याचे आदेश देण्यात आले आहेत. उपमुख्यमंत्री एकनाथ शिंदे यांच्या बालेकिल्ल्यातूनच २ मार्चपासून या दौऱ्यांना सुरुवात होणार आहे. त्याचबरोबर आमदार सुनील राऊत यांनी ईशान्य मुंबईतील कार्यकर्त्यांचे शिबिर मुलुंड येथे आयोजित केले आहे. ९ मार्च रोजी मुलुंड येथे होणाऱ्या या शिबिराला स्वत: उद्धव ठाकरे उपस्थित राहून मार्गदर्शन करणार आहेत.