सकाळ वृत्तसेवा
ठाणे, ता. २६ : ठाणे पूर्व भागातील अनेक इमारतींचा पुनर्विकास करण्यात येत आहे. त्यानुसार कोपरीतील सिंधी कॉलनीतील १६ नंबर इमारतधारकांना आधी ४५० चौरस फुटांचे घर विकसकाने मंजूर केले. मात्र, आता ते देणे शक्य नसल्याचे विकसकाने स्पष्ट केले. विकसकाने महापालिका अधिकाऱ्यांना आणि इमारतीमधील काहींना हाताशी धरून इमारतच अतिधोकादायक घोषित करून रहिवाशांना बेघर करण्याचा घाट घातल्याचा आरोप ठाणे शहर काँग्रेसचे अध्यक्ष विक्रांत चव्हाण यांनी केला आहे. त्यामुळे या रहिवाशांना योग्य न्याय मिळेपर्यंत काँग्रेस रस्त्यावर उतरून लढा सुरू ठेवेल, असा इशारा दिला आहे. ठाण्यात झालेल्या पत्रकार परिषदेत ते बोलत होते. या वेळी राहुल पिंगळे यांच्यासह कोपरीतील फसवणूक झालेले रहिवासीही उपस्थित होते.
विकसकाबरोबर २०१६मध्ये करार झाला होता. त्यानुसार ४५० चौरस फुटांचे घर देण्याचे त्याने मान्य केले होते. येथील ३६ रहिवाशांबरोबर हा करार करण्यात आला होता. परंतु, २०२२मध्ये त्याने ४०० चौरस फुटांचेच घर देऊ शकतो, असे रहिवाशांना सांगितले. त्याला आम्ही विरोध केला. त्यातही सोसायटी रजिस्टर नाही, कन्व्हेन्स नसल्याने विकसकाने वैयक्तिक करार केले होते. असे असताना काही रहिवाशांनी विरोध केल्याने विकसकाने आता मी इमारतच बांधणार नसल्याचे सांगितले. त्यानंतर येथील अर्ध्याहून अधिक रहिवाशांनी याला विरोध केला. विकसकाने काही रहिवाशांना हाताशी धरून पालिका अधिकाऱ्यांशी संगनमत करत इमारतीला अतिधोकादायकमध्ये नोंद करून घेतली. आता पालिकेने कारवाईही प्रस्तावित केली आहे. या घटनेचा आम्ही निषेध करत असून, येथील रहिवाशांना न्याय मिळावा, हक्काचे घर मिळावे, असे मत चव्हाण यांनी स्पष्ट केले. विकसकाच्या या धोरणाविरोधात रहिवासी न्यायालयातही गेले होते. मात्र, पालिकेने इमारत अतिधोकादायक असल्याचे पुरावे सादर केल्याने याचिका हारली. आता रहिवाशांना न्याय मिळत नाही, तोपर्यंत काँग्रेस रस्त्यावर उतरून लढा सुरू ठेवणार असल्याचा इशाराही चव्हाण यांनी दिला.