चित्रनगरी परिसरातील आदिवासींच्या पुनर्वसनाबाबत बैठक
चर्चा करून निर्णय घेण्याची खासदार रवींद्र वायकरांची मागणी
जोगेश्वरी, ता. २६ ः चित्रनगरीच्या जागेतील आदिवासी पाड्यांचे पुनर्वसन करण्यापूर्वी त्यांच्याशी चर्चा करावी. सर्व मूलभूत सोयीसुविधा देऊन उपजीविकेच्या साधानासहित त्यांचे पुनर्वसन करण्यासाठी प्राधान्य द्यावे, अशी सूचना मुंबई उत्तर पश्चिम लोकसभा क्षेत्राचे खासदार रवींद्र वायकर यांनी चित्रनगरीत व्यवस्थापकीय संचालक यांच्यासमवेत सोमवारी (ता. २४) पार पडलेल्या बैठकीत केली.
चित्रनगरीच्या अखत्यारीत असलेल्या जागेमध्ये नुकतीच आग लागली होती. त्या पार्श्वभूमीवर खासदार वायकर यांनी चित्रनगरीत बैठक घेतली. या बैठकीला व्यवस्थापकीय संचालक स्वाती म्हसे पाटील, सहव्यवस्थापकीय संचालक डॉ. धनंजय सावलकर, आरेचे मुख्य कार्यकारी अधिकारी शिपूरकर, नायब तहसीलदार किरण आम्बुर्ली, भूमापक आर. जे. ठाकूर, पी. दक्षिण मनपा विभागाचे सहाय्यक आयुक्त संजय जाधव, अग्निशमन दलाचे अधिकारी सोमनाथ जायभाय, वनपाल आर. पी. पाटोळे, माजी नगरसेविका रेखा रामवंशी, शाखाप्रमुख बाळकृष्ण जोशी, राजन राणे, पूजा शिंदे, सुरेखा गुटे, हिनल पंड्या, रेणू यादव आदी पदाधिकारी व कार्यकर्ता उपस्थित होते.
अग्निशमन यंत्रणा सक्षम करण्यासाठी चित्रनगरी स्वतःची अग्निशमन यंत्रणा उभारणार असून, एका फायर अधिकाऱ्याची नेमणूकही करणार असल्याची माहिती म्हसे पाटील यांनी या वेळी दिली. चित्रनगरीने स्‍वतःच्या जागेचे सर्वेक्षण करून जागेसभोवताली कुंपण घालण्याची सूचना खासदार वायकर यांनी केली. चित्रनगरीचा मास्टर प्लॅन तयार करण्यात येत असून, टप्प्याटप्प्याने त्याचा विकास करण्यात येणार आहे. आझादी का अमृत फंडच्या माध्यमातून सध्या चित्रनगरीतील स्टुडिओचे नूतनीकरणाचे काम सुरू असल्याची माहिती म्हसे पाटील यांनी दिली.
चित्रानगरीतील अनधिकृत गोदामे काढून टाकण्यात यावीत, शाळेच्या बसेस चित्रनगरीतून जाण्याची मुभा द्यावी, वनराई पोलिस ठाणे येथील रस्ता खुला करावा, स्थानिकांना नोकरीत प्राधान्य द्यावे, अशा सूचनाही खासदार वायकर यांनी व्यवस्थापकीय संचालकांना केल्‍या.