गॅस गळतीमुळे भीषण आग
तळोजा येथील शिर्के कामगार वसाहतीमधील घटना
खारघर, ता. २६ (बातमीदार) : तळोजा येथील बी.जी. शिर्के कामगार वसाहतीमध्ये सिलिंडरमधून झालेल्या गॅस गळतीमुळे भीषण आग लागल्याची घटना बुधवारी (ता. २६) घडली. या आगीत येथील कामगारांच्या घरांचे मोठ्या प्रमाणात नुकसान झाले. कळंबोली येथील अग्निशमन जवानांनी वेळीच आग आटोक्यात आणल्याने पुढील अनर्थ टळला.

तळोजा फेज दोनमध्ये सिडकोच्या गृहनिर्माण प्रकल्पाचे काम सुरू आहे. हे काम शिर्के कन्ट्रक्शन कंपनीच्या माध्यमातून सुरू आहे. या कंपनीत काम करणाऱ्या कामगारांच्या निवासासाठी लोखंडी पत्र्यांची घरे उभारण्यात आली आहेत. या वसाहतीला बुधवारी सकाळी दहा वाजण्याच्या सुमारास भीषण आग लागली. येथील सिलिंडरमधील गॅस गळतीमुळे लागलेल्या या आगीत पंधराहून अधिक घरे जळून खाक झाली. या आगीत कामगारांच्या साहित्याचे मोठे नुकसान झाले. या आगीमुळे परिसरात मोठ्या प्रमाणात धुराचे लोट पसरले होते. यामध्ये कामगारांचे बहुतांश जीवनावश्यक साहित्य जळून खाक झाले. या घटनेची माहिती मिळताच कळंबोली येथील अग्निशमन दलाने घटनास्थळी धाव घेत घटनास्थळाहून तीन सिलिंडर बाहेर काढले, त्यामुळे पुढील अनर्थ टळला. कळंबोली अग्निशमन केंद्राचे अधिकारी फतेसिंग गायकवाड यांनी या वेळी सांगितले, की ‘या स्फोटात सिलिंडरमधील गॅस गळतीमुळे ही आगीची घटना घडल्याचे दिसून येते. या आगीत कामगारांच्या मालमत्तेचे नुकसान झाले; मात्र कोणतीही जीवितहानी झाली नाही.’ दरम्यान, वर्षभरापूर्वी कामगारांच्या या चाळीत सिलिंडर स्फोट होऊन दहा घरांचे नुकसान झाले होते. त्या स्फोटात दोन जण किरकोळ जखमी झाले होते.