पालिका उभारणार सीएसआर फंडातून निधी
औद्यागिक पट्ट्यातील कारखानदारांची घेणार मदत
वाशी, ता. २६ (बातमीदार) ः नवी मुंबई महापालिका औद्योगिक क्षेत्रामध्ये असणाऱ्या कारखानदारांकडून तसेच दानशूर व्यक्तींमार्फत सामाजिक उत्तरदायित्व निधी (सीएसआर) जमा करणार आहे. तर हा निधी पालिका शहरातील वेगवेगळ्या सामाजिक उपक्रमांसाठी खर्च करण्यात येणार आहे. हा निधी सामाजिक, आरोग्य, शैक्षणिक, पर्यावरण यासाठी खर्च करणार आहे. नवी मुंबई महापालिकेच्या आर्थिक वर्षाच्या अर्थसंकल्पातून महापालिका आयुक्त डॉ. कैलास शिंदे यांनी ना नफा, ना तोटा या तत्त्वावर एक विशेष कंपनी स्थापन करण्याचा मानसदेखील व्यक्त केला आहे.
नवी मुंबई पालिकेचे आयुक्त डॉ. कैलास शिंदे यांनी येत्या आर्थिक वर्षाचा पाच हजार ७०९ कोटी रुपयांच्या जमा-खर्चाचा अर्थसंकल्प मंगळवारी सादर केला. पालिकेच्या वेगवेगळ्या बँकांमध्ये १,३०० कोटी रुपयांच्या ठेवी आहेत. ५० कोटी रुपयांपेक्षा अधिक रकमेचे व्याज पालिकेस दरवर्षी मिळते. यामध्ये पुढील वर्षातदेखील यात वाढ होणार आहे. ठाणे-बेलापूर औद्योगिक पट्ट्यातील मोठ्या कंपन्या तसेच दानशूर व्यक्तींकडून सामाजिक माध्यमातून दिला जाणारा निधी कसा गोळा करता येईल याची चाचपणी आता पालिका प्रशासनाने सुरू केली आहे. पालिकेकडून कंपनी कायद्याखाली कलम आठनुसार ना नफा, ना तोटा या तत्त्वावर कंपनी स्थापन करण्याचा निर्णय घेतला आहे. नवी मुंबईत असणाऱ्या कंपन्यांकडून सीएसआर निधी देण्यासाठी तयार असतात. मात्र असा निधी घेणे व त्याचा वापर करणे याबाबत महापालिकेकडे कार्यपद्धती नसल्यामुळे कंपन्यांकडून पालिकेला असा निधी प्राप्त होत नाही. त्यामुळे पालिकेचेदेखील नुकसान होते. यासाठी पालिकेकडून एक विशेष कंपनी स्थापन करून हा निधी सामाजिक कार्यासाठी वापरण्यात येणाार असल्याचे पालिका आयुक्त डॉ. कैलास शिंदे यांनी स्पष्ट केले.
....................
निधीचा उपयोग सामाजिक उपक्रमांवर
कंपन्या तसेच नागरिकांकडून सीएसआरच्या माध्यमातून निधी गोळा करण्यासाठी महापालिकेने नवी कंपनी स्थापन करण्याचे संकेत या अर्थसंकल्पात दिले आहेत. ही कंपनी ना नफा, ना तोटा या तत्त्वावर कार्यरत राहील, अशी माहिती आयुक्त डॉ. कैलास शिंदे यांनी दिली. सीएसआरमार्फत उभा केला जाणारा निधी सामाजिक, शैक्षणिक, आरोग्य, पर्यावरण तसेच अपंगांसाठी राबविण्यात येणाऱ्या वेगवेगळ्या योजनांवरच खर्च केला जाईल, असेही आयुक्तांनी स्पष्ट केले.