शिवभक्तांनी कचऱ्यातूनच घेतले शिवदर्शन!
अंबरनाथ, ता. २६ (वार्ताहर) : अंबरनाथमध्ये ऐन महाशिवरात्रीच्या दिवशीही जागोजागी कचऱ्याचे ढिगारे साचले होते. भाविकांनी याच कचऱ्याच्या ढिगाऱ्यातून प्रवास करत मंदिरात दर्शनासाठी रांगा लावल्या होत्या. नगरपालिकेच्या वतीने समीक्षा कंपनीला शहरातील कचरा उचलण्याचा ठेका देण्यात आला आहे. मात्र, सात महिन्यांपासून ठेकेदाराचे बिल थकल्यामुळे सफाई कर्मचाऱ्यांचे पगार थकले. तसेच पीएफ, फंड, आरोग्य सुविधा या मागण्या घेऊन पालिका कंत्राटी सफाई कर्मचाऱ्यांनी संप पुकारला. दरम्यान, त्यांच्या या संपाचा आजचा पाचवा दिवस उलटल्यानंतरही कर्मचाऱ्यांच्या इतर मागण्या मान्य न झाल्याने शहरात कचऱ्याचे ढीग साचले आहेत. एकीकडे देशभरात महाशिवरात्रीचा जल्लोष सुरू असताना अंबरनाथमध्ये मात्र भाविक कचऱ्यातून ये-जा करताना दिसत आहेत. अंबरनाथमधील प्राचीनकालीन हे शिवमंदिर आहे. भाविकांचे श्रद्धास्थान आणि जागृत मंदिर म्हणून याची ख्याती आहे. ठाणे जिल्ह्यासह रायगड जिल्ह्यातून भाविक दर्शनासाठी येथे पहाटेपासून रांगा लावतात. याच कचऱ्यातून त्यांना दर्शनासाठी जावे लागले. दरम्यान, ठेकेदाराने थकीत पगार दिल्यानंतर ही कर्मचाऱ्यांनी आपल्या इतर मागण्यांसाठी संप कायम ठेवल्याने अंबरनाथमध्ये यंदा भाविक कचऱ्याच्या ढिगाऱ्यातून चालत आहेत.