ताम्हिणी घाटात
एसटी-कारची धडक
दोघांचा जागीच मृत्यू; तिघे जखमी
माणगाव, ता. ४ (बातमीदार) ः ताम्हिणी घाटात एसटी बस आणि कारची समोरासमोर धडक होऊन झालेल्या भीषण अपघातात कारमधील दोघांचा जागीच मृत्यू झाला, तर तिघे जखमी झाले. ही घटना मंगळवारी (ता. ४) दुपारी दीड वाजण्याच्या सुमारास घडली. मानसकुमार साहू (वय ३८) आणि सखुबाई कानवडे (६५) अशी मृतांची नावे आहेत.
खेड आगाराची बस मंगळवारी दुपारी खेडहून चिंचवडकडे निघाली होती, तर कार पुण्यावरून महाडच्या दिशेने येत होती. ताम्हिणी घाटातील मौजे कोंडेथर गावानजीक दुपारी दीड वाजण्याच्या सुमारास दोन्ही वाहनांची समोरासमोर भीषण धडक झाली. हा अपघात इतका भीषण होता, की कारचा समोरचा भाग पूर्णपणे चक्काचूर झाला. अपघातात कारमधील दोन प्रवासी मानसकुमार निरंजन साहू (रा. पौड) आणि सखुबाई तुकाराम कानवडे (रा. मुळशी) यांचा जागीच मृत्यू झाला, तर अन्य तिघे जखमी झाले. रुपाली मानसकुमार साहू (२८), रमा मानसकुमार साहू (७) आणि ताराबाई बाळू नलावडे (४५) अशी जखमींची नावे आहेत. अपघाताची माहिती मिळताच माणगाव पोलिसांनी घटनास्थळी धाव घेत जखमींना माणगाव उपजिल्हा रुग्णालयात दाखल केले. पुढील तपास माणगाव पोलिस ठाण्याचे पोलिस निरीक्षक निवृत्ती बोराडे हे करीत आहेत.