फर्निचर मार्केटला भीषण आग
वारांगडे येथील सात दुकाने जळून खाक
बोईसर, ता. ४ (बातमीदार) ः बोईसर पूर्वेकडील वारांगडे-गुंदले गावाच्या हद्दीतील फर्निचरच्या दुकानांना मंगळवारी (ता. ४) सकाळी भीषण आग लागली. फर्निचरचे साहित्य आणि गोदामांमुळे आगीने अवघ्या काही वेळेतच रौद्ररूप धारण केले. ही आग इतकी भीषण होती, की धुराचे लोट दूरवरूनही दिसत होते. सुदैवाने आगीत कोणतीही जीवितहानी झाली नसली तरी वित्तहानी मात्र मोठ्या प्रमाणात झाली आहे.
बोईसर-चिल्हार मार्गावरील वारांगडे येथील फर्निचर मार्केटला सोमवारी सकाळच्या सुमारास अचानक भीषण आग लागली. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या; मात्र दुकाने एकमेकांना लागून असल्याने आग विझवतानाही अडचणी येत होत्या. अखेर अग्निशमन दलाच्या अथक परिश्रमानंतर आगीवर नियंत्रण मिळविण्यात यश आले. पोलिस आणि अग्निशमन दलाच्या वतीने आगीच्या कारणांचा शोध घेतला जात आहे. दरम्यान, या घटनेत लाखो रुपयांचे नुकसान झाल्याची प्राथमिक माहिती मिळत आहे.
----
...तर मोठा अनर्थ
फर्निचर मार्केटच्या बाजूलाच सेंट फ्रान्सिस शाळा आहे; परंतु आग वेळीच आटोक्यात आल्याने आग शाळेपर्यंत पोहोचली नाही. या शाळेच्या स्कूल बस या फर्निचर दुकानांच्या बाजूलाच उभ्या केल्या जातात. ही आग बसपर्यंत पोहोचली असती तर मोठा अनर्थ घडला असता, अशी चर्चा परिसरात सुरू होती.