बहुरूपी पोलिसांमुळे नागरिकांचा गोंधळ
कांदिवली, ता. ९ (बातमीदार) ः महाराष्ट्रात विविध प्रकारचे लोककलावंत आहेत. बहुरूपी हा त्यातीलच एक प्रकार. हे कलाकार कोणाचीही हुबेहूब नक्कल करून सर्वांना आनंद देऊन आपली उपजीविका भागवतात. यामध्ये प्रामुख्याने फौजदार, शंकर, हनुमान यांचे वेष धारण करून गावोगावी फिरून आपल्या संसाराचा गाडा हाकतात. पोलिसांच्या वेषातील बहुरूपी पोलिसांमुळे कांदिवली पश्‍चिमेत एकच गोंधळ उडाला होता.
कांदिवली पश्चिमेला एकता नगर म्हाडा वसाहतीमध्ये हे बहुरूपी पोलिस पैसे मागत फिरत होते. बहुतांशी नागरिकांनी पैसे दिले, मात्र पोलिस नागरिकांकडे पैसे मागत असल्याची बातमी वाऱ्यासारखी पसरली. स्थानिकांनी चारकोप पोलिस ठाण्याला याबाबत माहिती दिली. चारकोप पोलिसांनी चौकशी केली असता, आम्ही बहुरूपी आहोत, प्रवासी लोक कलावंत आहोत, असे सांगितले. पोलिसांनी त्यांना बहुरूपी आहात ते सांगा अन्यथा पोलिसांची वर्दी घालू नका, अशी सूचना देत सोडून दिले.
कांदिवली पश्चिम मेट्रो स्टेशनच्या बाजूच्या एकता नगर विभागात दुपारी चार पोलिस पैसे मागताना दिसून आले. खोटे पोलिस नागरिकांकडून पैसे लुटत असल्याची बातमी पसरली. शाखाप्रमुख विजय मालुसरे यांनी तातडीने पोलिस वेषातील त्या चार तरुण पोलिसांना पकडले. गर्दी जमल्याने ते तरुण घाबरले होते. काही वेळातच पोलिस उपनिरीक्षक विशाल तेजाळे यांनी पोलिस वेषातील चार तरुणांना पकडून पोलिस ठाण्यात नेले. चौकशी केली असता त्‍यांनी सांगितले की, होळीच्या काही दिवस अगोदरच आम्ही बहुरूपी वेगवेगळे पोशाख घालून, वेशभूषा करून नागरिकांकडे पैसे मागतो, त्यांचेही मनोरंजन होत असल्याने आनंदाने, स्वखुशीने पाच, दहा, वीस, पन्नास, तर काही शंभर रुपये देतात. त्‍यामुळे आम्हाला होळी सणानिमित्ताने चांगली कमाई होते. दोन दिवसांपासून आम्ही पोलिसांची वेशभूषा करून पैसे मागत आहोत.

पोलिसांची वर्दी घालू नका!
पोलिसांनी या प्रकाराची खोलवर चौकशी केली. बहुरूपी खेड्यात चालतात, मुंबईत बहुरूपी फारच कमी झाले आहेत. बहुरूपी म्हणून फिरत असाल, तर बहरूपी आहोत असे सांगा, पोलिसांची वर्दी घालू नका, पुन्हा कांदिवलीत फिरू नका, अशा सूचना देत चारही बहुरूपी पोलिसांना सोडण्यात आले.