डंपरच्या धडकेत सहा जण जखमी
ठाणे शहर, ता. ९ (बातमीदार) : पूर्व दृतगती महामार्गावर डंपरच्या अपघातात एकाच कुटुंबातील सहा जण गंभीर जखमी झाल्याची घटना घडली आहे. रविवारी (ता. ९) रात्री एक वाजता मुंबई नाशिक वाहिनीवर मातीचा डंपर पुढच्या गाडीला धडकून हा अपघात झाला. सर्व जखमींना खासगी रुग्णालयात दाखल केले असून, तेथे त्यांच्यावर उपचार सुरू आहेत. अपघातात चारचाकी वाहनाचे प्रचंड नुकसान झाले असून, वाहनात अडकलेल्या व्यक्तींना कटरच्या मदतीने बाहेर काढण्यात आले.

मुंबई-नाशिक वाहिनीवर मुलुंडकडून येणारा मातीचा डंपर सुसाट वेगाने कशेळीकडे जात होता. या वेळी चालकाचे नियंत्रण सुटल्याने डंपर समोरच्या आयशर टेम्पोला जाऊन धडकला. यामुळे टेम्पोने समोरच्या चारचाकी वाहनाला धडक दिली. या धडकेत चारचाकी वाहनाचा चक्काचूर झाला. या वेळी चारचाकी वाहनात एकाच कुटुंबातील सहा प्रवासी बसले होते. ते सर्वजण गाडीमध्ये अडकले. अपघाताची माहिती मिळताच वाहतूक आपत्ती व्यवस्थापन आणि स्थानिक पोलिसांनी घटनास्थळी धाव घेत वाहनांमध्ये अडकलेल्या पाच जणांना बाहेर काढले. बाहेर काढताना कटरचा वापर करावा लागला.

कॅडबरी कंपनी येथील उड्डाणपुलाच्या उतरणीला हा अपघात झाला. अपघातात कारचालक राहुल जावळे, (वय ३६) स्वाती जावळे (३५) स्वरा जावळे (१२) शांभवी जावळे (१) प्रियंका बागुल (३८) शौर्य विजय बागुल (१६) हे जखमी झाले आहेत. कारमध्ये राहुल आणि स्वाती त्यांना अग्निशमन दलाच्या जवानांनी बाहेर काढले. अपघात होताच डंपरचालक पसार झाला. मातीने भरलेला हा डंपर मुलुंडकडून कशेळीच्या दिशेने चालला होता. या अपघातामुळे कॅडबरी पुलावरून घोडबंदरच्या दिशेने जाणारी वाहतूक सुमारे एक तास बंद होती. ती सेवा रस्त्यावरून धीम्या गतीने सुरू होती. घटनास्थळी अग्निशमन दलाचे जवान, आपत्ती व्यवस्थापन कक्षाचे कर्मचारी व वाहतूक पोलिस कर्मचारी यांनी अपघातग्रस्त तिन्ही वाहने रोडच्या बाजूला केली असून, ठाणे घोडबंदर वाहिनीवरील वाहतूक सुरळीत करण्यात आली.