पेण, ता. ९ (वार्ताहर) : पीओपीच्या गणेशमूर्तींवर आलेल्या बंदीमुळे महाराष्ट्रासह रायगड जिल्ह्यातील लाखो गणेशमूर्ती कारखानदारांवर तसेच त्यावर रोजगार करणाऱ्या कारागिरांवर उपासमारीची वेळ येणार आहे. याविरोधात राज्‍य सरकार गणेश कारखानदारांना न्याय मिळेल, या दृष्टिकोनातून पावले उचलणार असल्याची माहिती सांस्कृतिक मंत्री तथा भाजप रायगड जिल्हा संपर्क मंत्री आशीष शेलार यांनी दिली.
पेण तालुक्यातील हजारो गणेश कारखानदार आपल्‍या न्याय मागण्यांसाठी लवकरच मुंबई येथे धडकणार आहेत. या पार्श्वभूमीवर शेलार यांनी पेणमध्ये गणेशमूर्तिकारांची भेट घेत समस्‍या जाणून घेतल्‍या. पेण हे गणेशमूर्तींचे माहेरघर आहे, मात्र पीओपीच्या मूर्तींवर बंदी घालण्यात आल्‍याने लाखो कामगारांचे हाल होणार असून, अनेकांवर बेरोजगारीची वेळ येणार आहे. गणेश कारखानदारांमध्ये नाराजीचे सावट पाहता, ही बंदी कायमस्वरूपी उठवावी यासंदर्भातील मूर्तिकारांच्या लढ्यात सरकार पूर्णपणे त्यांच्या पाठीशी असून, त्यांना न्याय मिळवून देण्याच्या दृष्टीने पावले उचलली जातील, असे आशीष शेलार यांनी सांगितले.

गणेशमूर्तिकारांच्या बाबतीत सरकार गंभीर आणि संवेदनशील आहे. या न्यायालयीन लढ्यात सरकार मूर्तिकारांच्या बाजूने आणि कायदेशीर बाबीत योग्य ती भूमिका मांडणार आहे. पीओपीच्या मूर्तींबाबत जे चालले आहे, त्यामध्ये सरकार मूर्तिकारांच्या सकारात्मक भूमिकेत आहेत. त्यामुळे सरकारशी त्यांची चर्चा सुरू आहे. योग्य निर्णय लवकरच होईल.
आशीष शेलार, संपर्क मंत्री रायगड

राज्यातील लाखोंच्या संख्येने गणेशमूर्तिकार तसेच कारागीर येत्या ११ तारखेला मुंबई येथे मूर्तिकारांचा मेळाव्यासाठी येत असून, ही लढाई पीओपीच्या बाबतीत आहेत. त्यामुळे सरकारला आमचे म्हणणे आहे की याबाबतची बंदी उठवून मूर्तिकारांबाबत योग्य निर्णय द्यावा.
अभय म्हात्रे - अध्यक्ष गणपती मूर्तिकार संघटना