बोईसर, ता. ९ (बातमीदार) : बचत गटांच्या माध्यमातून महिलांना रोजगार उपलब्ध करून देणाऱ्या उमरोळी येथील विसावा बचत गटाच्या महिलांचा महिलादिनी सत्कार करून त्यांना त्यांच्या कार्यासाठी प्रोत्साहन देण्यात आले. पालघर जिल्हा शिक्षण व प्रशिक्षण संस्था, जिल्हा प्राथमिक व माध्यमिक शिक्षण विभाग आणि पंचायत समिती शिक्षण विभाग यांच्या संयुक्त विद्यमाने उमरोळी येथे राष्ट्रीय शैक्षणिक धोरण २०२०च्या शिक्षक क्षमता वृद्धी प्रशिक्षणाच्या पाच दिवसांच्या चौथ्या बॅचचा समारोप शनिवारी (ता. ८) झाला. या प्रशिक्षणामध्ये तालुक्यातील प्राथमिक, माध्यमिक व कनिष्ठ महाविद्यालयातील सुमारे १६५ शिक्षक सहभागी झाले होते. या प्रशिक्षणाच्या समारोपानंतर जागतिक महिला दिन साजरा करण्यात आला. या वेळी उमरोळी येथे महिलांच्या सक्षमीकरणासाठी कार्यरत असलेल्या विसावा बचत गटाच्या कविता राऊत आणि अक्षता पाटील यांचा प्रशिक्षणाचे सुलभक आणि समन्वयक यांच्या वतीने सत्कार करण्यात आला.