अदाणीच्या उत्थानचा तिसरा वार्षिक उत्सव
गरजू विद्यार्थ्यांना शैक्षणिक मदत
मुंबई, ता. ९ : मुंबईच्या महापालिका शाळांमधील पंचवीस हजार गरजू विद्यार्थ्यांच्या शैक्षणिक आयुष्यात मोठा फरक घडविणाऱ्या अदाणी इलेक्ट्रिसिटी आणि अदाणी फाउंडेशन यांच्या उत्थान या सीएसआर उपक्रमाचा एक भाग म्हणून तिसरा वार्षिक उत्थान उत्सव नुकताच मुंबईत साजरा करण्यात आला.
याप्रसंगी उत्थान उपक्रमाची माहिती देणारे कॉफीटेबल बुक प्रसिद्ध करण्यात आले. महापालिका आयुक्त भूषण गगराणी, अतिरिक्त आयुक्त डॉक्टर अमित सैनी, उपायुक्त (शिक्षण) डॉक्टर प्राची जांभेकर, अदाणी फाउंडेशनचे कार्यकारी संचालक वसंत गढवी, तसेच अदाणी इलेक्ट्रिसिटीचे वरिष्ठ व्यवस्थापक हजर होते. या वेळी महापालिकेचे शिक्षण अधिकारी, तसेच अदाणी फाउंडेशनचे वरिष्ठ व्यवस्थापक हजर होते.
उत्थान उत्सव कार्यक्रमात विविध आंतरशालेय सांस्कृतिक, निबंध लेखन, चित्रकला, टाकाऊतून टिकाऊ आदी स्पर्धा घेण्यात आल्या. शिक्षकांसाठी गायन आणि नृत्य स्पर्धा तर पालकांसाठी पौष्टिक टिफिन तयार करणे, गायन, रांगोळी स्पर्धा घेण्यात आल्या. या उपक्रमात विद्यार्थ्यांची नेत्रतपासणी करून गरज असलेल्यांना चष्मेही देण्यात आले. या उपक्रमात शिक्षकांसाठी विशेष सत्रे असतात, तसेच पालकांना शाळेत बोलावून किंवा घरी जाऊनही माहिती दिली जाते.

८२ शाळांची निवड
उत्थान प्रकल्प सप्टेंबर २०२१ मध्ये सुरू झाला. त्यानंतर या प्रकल्पात महापालिकेच्या ८२ गरजू शाळा काटेकोर तपासणीअंती निवडण्यात आल्या. प्रकल्पाचा फायदा पंचवीस हजार विद्यार्थ्यांना झाला आहे. नुकतीच अदाणी इलेक्ट्रिसिटी आणि अदाणी फाउंडेशनने महापालिकेच्या सहकार्याने शिष्यवृत्तीच्या तयारीसाठीची वीस हजार पुस्तके साडेपाच हजार विद्यार्थ्यांना दिली. तसेच ८२ शाळांमध्ये बारा हजार लायब्ररीची पुस्तकेही दिली.