घरगुती वादातून महिलेचा खून
कासा पोलिसंकडून गुन्हा दाखल

कासा, ता. १० (बातमीदार) ः थेरोंडा धापशीपाडा येथे एका महिलेचा तिच्याच नवऱ्याने घरगुती वादातून गंभीर मारहाण करून खून केल्याची घटना घडली. याप्रकरणी कासा पोलिस ठाण्यात गुन्हा दाखल करण्यात आला आहे.
गुलाब सुरेश भोईर (वय ५२) हिला ९ मार्चला सायंकाळी तिचा नवरा सुरेश रामा भोईर (वय ५८) याने घरगुती कारणावरून वाद घालून मारहाण केली. फिर्यादी रामदास सुरेश भोईर (वय ३१) यांनी दिलेल्या तक्रारीनुसार, आरोपीने पीडित महिलेला घरातून बाहेर जाण्याचे कारण विचारले आणि तिला मारहाण करण्यास सुरुवात केली. आरोपीने महिलेला थप्पड, लाथाबुक्क्यांनी मारहाण केली, तसेच हातात दगड घेऊन डोक्यावर, छातीवर आणि पाठीवर जबर मार दिला. त्यामुळे तिला गंभीर दुखापती झाल्या आणि तिचा मृत्यू झाला. या वेळी फिर्यादी आणि इतरांनी सोडवण्याचा प्रयत्न केला असता, आरोपीने त्यांनाही मारण्याची धमकी दिली. पोलिसांनी मृतदेहाचा तपासणी अहवाल प्राप्त केला असून, अधिक तपास सुरू आहे. घटनास्थळी अपर पोलिस अधीक्षक विनायक नरळे, उपविभागीय पोलिस अधिकारी गणपत पिंपळे, तसेच कासा पोलिस ठाण्याचे निरीक्षक अविनाश मांदळे यांनी भेट दिली. अधिक तपास पोलिस निरीक्षक अविनाश मांदळे व पोलिस उपनिरीक्षक किशोर पवार करीत आहेत.