कंपनीच्या सहकाऱ्याकडून तरुणीवर लैंगिक अत्याचार
अंधेरीतील घटना; सहकारी आरोपीस अटक
अंधेरी, ता. १२ (बातमीदार) ः एका खासगी कंपनीच्या सहकाऱ्यानेच त्याच्या सहकारी तरुणीवर लैंगिक अत्याचार केल्‍याची घटना समोर आली आहे. पीडित तरुणीच्या तक्रारीवरून साकीनाका पोलिसांनी आरोपी सहकारी परमजीतसिंग तरलोकचंदसिंग कलसी याच्याविरुद्ध लैंगिक अत्याचारासह खंडणीचा गुन्हा दाखल करून अटक केली.
आरोपीला अंधेरीतील स्थानिक न्यायालयाने पोलिस कोठडी सुनावली आहे. पीडित तरुणी ही ३१ वर्षांची असून ती अंधेरी परिसरात राहते. ती एका खासगी कंपनीत कामाला असून, तिथेच परमजीतसिंग हादेखील कामाला आहे. एकाच ठिकाणी कामाला असल्याने त्यांची चांगली मैत्री होती. शुक्रवारी (ता. ७) त्याने तिला त्याच्या कारमधून बसवून साकीनाका येथील एका हॉटेलमध्ये आणले. हॉटेलच्या रूममध्ये तिच्यावर जबदस्तीने लैंगिक अत्याचार केला. त्यानंतर तिच्या मोबाईलवरून जीपेद्वारे ५० हजार रुपये ट्रान्स्फर करण्याचा प्रयत्न केला. तिने चुकीचा पिन क्रमांक दिला म्हणून त्याने तिला बेदम मारहाण केली. त्यानंतर त्याने धमकी देऊन तिला घरी पाठवून दिले. या घटनेने तिला प्रचंड मानसिक धक्का बसला. रविवारी (ता. ९) तिने आरोपी सहकाऱ्याविरुद्ध साकीनाका पोलिसांत तक्रार केली. तक्रारीनंतर पोलिसांनी लैंगिक अत्याचारासह खंडणीचा गुन्हा दाखल केला. गुन्हा दाखल होताच परमजीतसिंगला त्याच्या जोगेश्वरीतील तिवारी चाळीतील राहत्या घरातून पोलिसांनी अटक केली.