वाशी, ता. १२ (वार्ताहर) : कोपरखैरणे येथे एका महिलेने रिक्षात विसरलेली तीन लाखांचे सोन्याच्या दागिन्यांची बॅग एका प्रामाणिक रिक्षाचालकाने परत केली. यामुळे धावत्या जगात व समाजात प्रामाणिकपणा आणि माणुसकी अजूनही जिवंत असल्याचा प्रत्यय आला.
पोलिसांकडून मिळालेल्या माहितीनुसार, फिर्यादी प्रियांका पार्टे या सकाळी गावावरून कोपरखैरणे येथे आल्या होत्या. रिक्षातून घरी जात असताना त्या आपली दागिन्यांची बॅग रिक्षातच विसरल्या. घरी पोहोचल्यावर बॅग हरवल्याचे त्यांच्या लक्षात आले. त्या बॅगमध्ये सुमारे तीन लाखांचे सोन्याचे दागिने होते. त्यामुळे त्यांनी तत्काळ कोपरखैरणे पोलिस ठाण्यात तक्रार दाखल केली. कोपरखैरणे पोलिसांनी या घटनेचे गांभीर्य लक्षात घेऊन तातडीने तपास सुरू केला. पोलिसांनी रिक्षाचालक अभिषेक बरदाडे याचा शोध घेऊन त्याला पोलिस ठाण्यात बोलावले. रिक्षाचालकाने बॅगमधील सर्व दागिने सुरक्षितपणे परत केले. रिक्षाचालकाच्या प्रामाणिकपणाबद्दल पोलिसांनी त्याचे कौतुक केले. दागिने परत मिळाल्याने प्रियांका पार्टे यांनी कोपरखैरणे पोलिसांचे आणि रिक्षाचालकाचे आभार मानले. रिक्षाचालक अभिषेक बरदाडेने दाखवलेल्या प्रामाणिकपणाबद्दल कोपरखैरणे पोलिसांनी त्याचा सत्कार केला.