कासा, ता. १२ (बातमीदार) : होळीला काही तासांचाच कालावधी शिल्लक आहे. ग्रामीण भागात हा सण मोठ्या उत्साहात साजरा केला जातो. शिमग्यानिमित्त स्थलांतरित मजूर आपल्या गावी परतताना दिसत आहेत. दिवाळीनंतर उपजीविकेसाठी स्थलांतरित झालेले कातकरी समाजातील अनेक नागरिक आता होळीच्या आदल्या दिवशी आपल्या गावी परतत आहेत.

या स्थलांतरामुळे दीड-दोन महिने गावे ओस पडली होती, मात्र आता शिमग्यानिमित्त नागरिक परतत असल्याने चारोटी नाका येथे मोठी गर्दी झाली आहे. काही जण रिक्षा-टेम्पोने प्रवास करत आहेत, तर काहींना प्रवासासाठी वाहन मिळत नसल्याने सामान डोक्यावर घेऊन पायीच निघाल्याचे चित्र आहे.

गणेशोत्सव, दिवाळी आणि होळी हे सण आदिवासी कातकरी समाज मोठ्या उत्साहात साजरे करतो. त्यात शिमग्याला विशेष महत्त्व आहे. या सणासाठी आवश्यक वस्तू खरेदी करण्यासाठी हे स्थलांतरित मजूर बाजारात गर्दी करत आहेत. घरी पोहोचल्यावर घराची साफसफाई करून चार दिवस सणाचा आनंद घेतल्यानंतर पावसाळा सुरू होईपर्यंत पुन्हा रोजगारासाठी स्थलांतरित होणार आहेत.

महामार्गावरही वाहनांची मोठी गर्दी दिसत असून त्यात स्थलांतरित मजुरांची संख्या लक्षणीय आहे. कडक उन्हाच्या झळा सोसत हे नागरिक घरी परतत आहेत. यासंदर्भात स्थलांतरित मजूर सूरज कोती म्हणाले की, आम्ही दीड महिन्यानंतर शिमग्यासाठी गावी चाललो आहोत. काही पैसे कमवले आहेत, तर काही उधारी घेतली आहे. हा सण नातेवाईकांसोबत साजरा करून घराची थोडी दुरुस्ती करून पुन्हा कामासाठी बाहेर पडणार आहोत. तिथे मजुरी चांगली मिळते आणि गरज पडल्यास उधारीही मिळते, त्यामुळे आम्ही दरवर्षी बाहेर जात असतो.