उरण, ता. १२ (वार्ताहर) : आगरी कोळी आणि कराडी यांचा महत्त्वाचा मानला जाणारा सण म्हणजे होळी. त्यामुळे होळी व धूलिवंदनसाठी विविध प्रकारच्या रंगांनी, तसेच निरनिराळ्या आकाराच्या पिचकाऱ्यांनी उरण बाजारपेठ सजली आहे. पिचकाऱ्या व रंग खरेदीसाठी नागरिक आपल्या मुलांसह दुकानांमध्ये गर्दी करीत आहेत.
उरणच्या बाजारपेठेत सर्वच टँक, पंप, कार्टुन, प्रोजन, डोरेमॉन, मिकी माउस, स्पायडर मॅन आदी प्रकारच्या लहान-मोठ्या पिचकाऱ्या विक्रीसाठी ठेवण्यात आल्या आहेत. नैसर्गिक रंगही बाजारात विक्रीसाठी आले आहेत. उरण तालुका हा पूर्व आणि पश्चिम विभागात व्यापला आहे. उरणच्या सर्वच भागातून उरण शहरातील बाजारपेठेमध्ये खरेदीसाठी गर्दी केली जात आहे. रंग उधळून व पिचकारीने रंग उडवून मौज मस्तीने होळी, धूलिवंदन सण लहान मुलांसह मोठेही साजरा करीत आहेत. त्यामुळे या सणासाठी लागणारे रंग व पिचकाऱ्या उरण बाजारपेठेमध्ये विक्रीस आल्या आहेत. ५० रुपयांपासून ते एक हजारपर्यंत वेगवेगळ्या पिचकाऱ्यांचे भाव आहेत.