रायगड पोलिसांकडून चोख बंदोबस्‍त
अलिबाग ता. १२ (वार्ताहर) : होळी पौर्णिमा आणि धूलिवंदन त्याचप्रमाणे सलग सुट्टीमुळे अलिबागमध्ये पर्यटकांचीही गर्दी होण्याची शक्‍यता आहे. दरम्यान कोणताही अनुचित प्रकार घडू नये, यासाठी रायगड पोलिस विभागाने सर्वत्र बंदोबस्त ठेवला आहे.
कोळी बांधवांतर्फेही होळी पौर्णिमेनिमित्त कार्यक्रमांचे आयोजन करण्यात येते. अलिबाग समुद्रकिनारी धुलिवंदननिमित्त बैलगाडी शर्यतींची परंपरा आहे. ग्रामीण भागात होळीची परंपरा जपण्याचे विशेष प्रयत्न होताना दिसतात. केळी, सावरी, पोफळीचे झाड होळीसाठी वापरले जाते.
जिल्ह्यात गुरुवारी दोन हजार ८९८ सार्वजनिक आणि एक हजार ११४ खासगी अशा एकूण चार हजार १२ होळ्‌या उभारल्‍या जाणार आहेत. धुळवडनिमित्त बाजारपेठेमध्ये वेगवेगळे रंग, पिचकाऱ्यांनी सजल्या आहेत. होळी पौर्णिमा, धूलिवंदन या सुट्यांमुळे अनेक पर्यटक रायगड जिल्ह्यात पर्यटनासाठी येतात. होलिकोत्सव आणि धुळवडीच्या पार्श्वभूमीवर रायगड पोलिस विभागाने वडखळ, कर्जत, माणगाव, महाड, श्रीवर्धन येथे आरसीपीची पथके तैनात केली आहेत.