लग्नाच्या भूलथापा देऊन महिलेची तीन लाखांची फसवणूक

कल्याण, ता. १२ (बातमीदार) : लग्नाच्या भूलथापा देऊन ३४ वर्षीय महिलेची फसवणूक केल्याचा प्रकार कल्याण पश्चिमेकडील रामदासवाडी येथे घडला. याप्रकरणी कल्याण पोलिसांनी आरोपी मितेश नवथरे याच्यावर फसवणुकीचा गुन्हा मंगळवारी (ता. ११) सायंकाळी दाखल केला.
मितेश नवथरे याने पीडित महिलेला लग्‍नाचे प्रलोभन दाखवून तिच्याकडून ९ नोव्हेंबर २०२४ ते ५ जानेवारी २०२५ या काळात तीन लाख रुपये उकळले. त्यानंतर आरोपीने पीडितेशी लग्नास नकार दिला तसेच पैसे देण्यासही नकार दिल्याचे पीडितेने आपल्या तक्रारीत नमूद केले आहे. अखेर आपली फसवणूक झाल्याचे समजताच पीडितेने महात्मा फुले चौक पोलिस ठाण्यात धाव घेत तक्रार दाखल केली. महिलेच्या तक्रारीच्या आधारे पोलिसांनी गुन्हा दाखल केला. दरम्यान, आरोपी मितेश नवथरे हा मूळचा मध्य प्रदेश इथला राहणारा आहे. तो फरार असून आरोपीचा शोध सुरू असल्याचे तपास अधिकाऱ्यांनी सांगितले.