अल्पवयीन मुलीवर अत्याचार करणारा गजाआड
नवी मुंबई, ता. १४ (वार्ताहर) : रबाळे परिसरात राहणाऱ्या २३ वर्षीय तरुणाने त्याच भागात राहणाऱ्या १३ वर्षीय अल्पवयीन मुलीवर लैंगिक अत्याचार केल्याची घटना उघडकीस आली आहे. पीडित मुलगी तपासणीसाठी हॉस्पिटलमध्ये गेल्यानंतर ती गर्भवती राहिल्याचे उघडकीस आले.

रबाळे एमआयडीसी पोलिसांनी पीडित मुलीवर लैंगिक अत्याचार करणाऱ्या सुन्या उर्फ सुनील रमेश रत्नाकर (वय २३) या आरोपीविरोधात बलात्कारासह पोक्सो कलमानुसार गुन्हा दाखल करून
त्याला अटक केली आहे. आरोपी सुन्या उर्फ सुनील रत्नाकर व पीडित मुलगी हे दोघेही सध्या शिक्षण घेत आहेत. आरोपीने वर्षभरापूर्वी पीडित मुलीसोबत प्रेमसंबंध निर्माण केले. त्यानंतर त्याने पीडितेला डिसेंबरमध्ये तळोजा येथील एका लॉजमध्ये नेऊन तिच्यावर जबरदस्तीने लैंगिक अत्याचार केले होते. त्यानंतरदेखील आरोपीने पीडित मुलीवर वेगवेगळ्या ठिकाणी लैंगिक अत्याचार केले. त्यामुळे पीडिता गर्भवती राहिल्याने तिच्या पोटात दुखण्यास सुरुवात झाली. त्यामुळे पीडितेच्या आईने तिला घणसोलीतील हॉस्पिटलमध्ये तपासणीसाठी नेल्यांनतर पीडित मुलगी १० आठवड्यांची गर्भवती असल्याचे उघडकीस आले. पीडिता अल्पवयीन असल्याने हॉस्पिटलने याबाबतची माहिती रबाळे एमआयडीसी पोलिसांना दिली. त्यानंतर पोलिसांनी पीडिताच्या तक्रारीवरून आरोपीविरोधात गुन्हा दाखल करून त्याला तत्काळ अटक केली.