डोंबिवली, ता. १८ (बातमीदार) : घराची सजावट, तसेच ढाबा आणि हॉटेलमधील अंतर्गत सजावटीसाठी बांबूपासून बनवलेल्या विविध वस्तूंचा वापर करण्याचे प्रमाण काही महिन्यांपासून वाढल्याचे दिसत आहे. सजावटीसह वापरासाठी बांबूच्या वस्तूंचा वापर करणे हा सध्या ट्रेण्ड बनत चालला आहे. त्यामुळे या बांबूच्या वस्तू विकणाऱ्यांची कल्याण पश्चिमेकडील परिसरात दुकाने थाटली आहेत.
घरासह ढाब्यांमध्ये हटके लूक देण्यासाठी बांबूपासून तयार केलेल्या वस्तूंचा मोठ्या प्रमाणात वापर केला जात आहे. पूर्वी भाजीपाला व इतर वस्तू ठेवण्यासाठी किंवा नेण्यासाठी बांबूच्या टोपल्यांना मागणी होती. कारण त्यांचा वापर मोठ्या प्रमाणात केला जात होता. काही वर्षांत बांबूपासून तयार करण्यात येणाऱ्या वस्तूंचीही सजावटीसाठी मागणी वाढली आहे. सजावटीचा वापर फक्त घरांपुरता मर्यादित राहिला नाही. बांबूपासून बनवलेल्या वस्तू या पर्यावरणपूरक असतात. त्याचबरोबर त्या बराच काळ टिकतात.

बांबूपासून तयार केलेला पाळणा, लॅम्परोइस, आइस्क्रीम कोन, सूप, टोपल्या, पंखा, झाडू आदी वस्तूंना ग्राहकांकडून मागणी आहे. या वस्तू टिकायला चांगल्या आणि मजबूत असल्याने ग्राहकांची मागणी वाढली आहे. घरात भाजीपाला, फळे तसेच भाकरी ठेवण्याबरोबरच बांबूच्या वस्तूंना मागणी आहे. मनमाड, सोलापूर, पुणे, कर्जत, मुरबाड आदी शहरांतून कच्चा तसेच तयार माल आणून त्याची या ठिकाणी विक्री केली जाते

वस्तूंचे दर (रुपयांत)
पाळणा ... ७००
सूप ... १०० ते २५०
टोपल्या ... ६० ते ३५०
पंखा ... ९०
झाडू ... ५० ते २००