मुलुंडमध्ये अखेर पाणीपुरवठा सुरळीत
मुलुंड, ता. १८ (बातमीदार) ः मुलुंड पूर्वेकडील पीएमजीपी कॉलनीमध्ये असलेल्या नाल्यात रविवारी (ता. १६ ) सकाळी ७५० मिमी व्यासाची पाइपलाइन फुटल्याने पाणीपुरवठा बंद करण्यात आला होता. सोमवारी (ता. १७ ) रात्री उशिरा दुरुस्ती पूर्ण झाल्यानंतर आज (ता. १८) दुपारी १ वाजल्यापासून पाणीपुरवठा सुरळीत करण्यात आला आहे.
यासंदर्भात ईशान्य मुंबईचे खासदार संजय दिना पाटील यांनी पालिकेच्या वरिष्ठ अधिकाऱ्यांशी संपर्क साधून पाणीपुरवठा लवकरात लवकर सुरळीत करावा तसेच टँकरद्वारे पाणीपुरवठा करावा, अशा सूचना केल्‍या होत्‍या. त्यानुसार रविवारी रात्रीपासून टँकरद्वारे पाणीपुरवठा सुरू केला.
रविवारी सकाळपासून मुलुंड पूर्वेतील पाणीपुरवठा थांबला होता, मात्र पाइपलाइन फुटलेले ठिकाण शोधण्यात पालिकेच्या अधिकाऱ्यांना अडचणी येत होत्या. अखेर पीएमजीपी कॉलनीमध्ये नाल्याच्या खाली पाइपलाइन फुटल्याचे आढळून आले. खाडी परिसरात दलदल आणि कचऱ्याचा मोठा साठा असल्याने सफाई करण्यात आणि भरतीच्या पाण्यामुळे दुरुस्तीचे काम सुरू ठेवण्यात वेळ लागला. पालिकेचे ६०हून अधिक कर्मचारी तीन दिवस दुरुस्तीच्या कामात व्यस्त होते.