नवी मुंबईत हिवताप, डेंगी आजारांबाबत जनजागृती
वाशी, ता. १८ (बातमीदार) ः नवी मुंबई महापालिका कार्यक्षेत्रामध्ये हिवताप, डेंगी आजाराचा प्रसार रोखण्यासाठी महापालिका आयुक्त डॉ. कैलास शिंदे यांच्या मार्गदर्शनाखाली आरोग्य विभागामार्फत शिबिरांचे आयोजन करण्यात आले आहे. या शिबिरांमधून नागरिकांमध्ये हिवताप, डेंगी आजारांबाबत व डासउत्पत्ती स्थानांबाबत प्रभावीपणे जनजागृती करण्यात येत आहे.
नुकतेच नवी मुंबई महापालिकेकडून १३ ते १५ मार्च या कालावधीत श्री गुरु सिंग सभा-सिक्ख नानकशाही सोहळ्यामध्ये सहभागी होणाऱ्या नागरिकांकरीता विशेष हिवताप, डेंगी जनजागृती शिबिराचे आयोजन करण्यात आले होते. या शिबिरामध्ये ४,३११ नागरिकांना हिवताप, डेंगी आजाराविषयी माहिती देण्यात आली. तसेच त्याच्या प्रतिबंधासाठी करावयाच्या उपाययोजनांबाबत जनजागृती करण्यात आली. या शिबिराचे वैशिष्ट्य म्हणजे येथे अ‍ॅनॉफिलीस व एडीस डासांची उत्पत्तीस्थाने प्रत्यक्षात दाखविण्यात आली. तसेच डासांच्या आळ्याही प्रत्यक्ष दाखविण्यात आल्या. त्याचप्रमाणे घराभोवती व घरांतर्गत होणारी डासोत्पत्ती स्थाने यांची प्रात्यक्षिकासह माहिती देण्यात आली. या वेळी पाणी साठवून ठेवलेले ड्रम हे ओढणी, धोतर किंवा साडीच्या कपड्याने बंदिस्त करणे, तसेच पाणी साठविण्याची भांडी व टाक्या बंदिस्त करणे, त्याचप्रमाणे आठवड्यातून एक दिवस पाणी साठविण्याची भांडी व टाक्या स्वच्छ करून कोरड्या ठेवणे, भंगार साहित्य व टायर्स इत्यादी नष्ट करणे, छतावरील प्लॅस्टिक शीट, ताडपत्री यामध्ये पाणी साचू न देणे आणि तापाची लक्षणे दिसताच त्वरित डॉक्टरांचा सल्ला घेणे याविषयी नागरिकांमध्ये जनजगृती करण्यात आली.