सहा महिन्यांपासून महापालिकेचे दुर्लक्ष, स्थानिकांकडून नाराजी
ठाणे शहर, ता.१८ (बातमीदार)ः ठाण्यातील कासारवडवली वाहतूक उप विभागातील खेवरा सर्कल, वसंत विहार आणि डॉ. काशिनाथ घाणेकर नाट्यगृह परिसरात ठाणे महापालिकेच्या खर्चातून उभारण्यात आलेली सिग्नल यंत्रणा सहा महिन्यापासून बंद होती. याबाबत लोकप्रतिनिधी तसेच स्थानिकांच्या तक्रारीनंतर ही सेवा पूर्ववत करण्यात आली आहे.
ठाण्यात रस्त्यांवर विविध कामे सुरू आहेत. या कामांमुळे घोडबंदर मार्गावरील सिग्नल यंत्रणेत काहीसा अनियमितपणा आला आहे. त्यामुळे अनेक ठिकाणी वाहन चालकांचा बेशिस्तपणा वाढला आहे. रिक्षा चालक आणि दुचाकी चालकांकडून वाहतूक नियमांचे भंग करण्याचे प्रमाण वाढले आहे. चुकीच्या दिशेने वाहन चालवण्याचे प्रकार होत होते. अशातच कासारवडवली वाहतूक उपविभागाच्या हद्दीमधील खेवरा सर्कल, वसंत विहार आणि डॉ. काशिनाथ घाणेकर नाट्यगृह या परिसरात असलेल्या सर्कलची सिग्नल यंत्रणा सुद्धा सुमारे सहा महिन्यापासून बंद ठेवण्यात आली होती. यामुळे वाहतूक कोंडी होत असल्याने माजी नगरसेवक तसेच स्थानिकांनी वाहतूक विभागाकडे तक्रारी केल्या होत्या.
------------------------------------
अपघातांचा धोका
सिग्नल यंत्रणा बंद असल्यामुळे वाहन चालकांकडून मोठ्या प्रमाणात चुकीच्या मार्गाने वाहने चालवली जात होती. त्यामुळे वाहतूक कोंडी आणि अपघात असा दुहेरी धोका येथे निर्माण झाला होता. ठाणे महापालिकेकडून जवळपा ५१ लाखांचा खर्च येथे करण्यात आला होता.