गृहकर्जासाठी म्हाडाकडून
तात्काळ मिळणार एनओसी
सोमवारपासून यंत्रणा सुरू होणार
बापू सुळे ः सकाळ वृत्तसेवा
मुंबई, ता. १८ : म्हाडाच्या लाॅटरीत लागलेले घर घेण्यासाठी अनेकांकडून वेगवगेळ्या बँकांकडून गृहकर्ज घेतले जाते. त्यासाठी आवश्यक असलेले ‘ना हरकत प्रमाणपत्र’ (एनओसी) आता तात्काळ मिळणार आहे. संबंधिताने म्हाडाकडे ‘एनओसी’साठी ऑनलाईन अर्ज केल्यानंतर ती लगेच देता यावी म्हणून म्हाडाने त्यांच्या प्रणालीत बदल केला आहे. त्यामुळे सोमवारपासून संबंधितांना म्हाडाची एनओसी मिळणार आहे.
म्हाडाकडून सर्वसामान्यांच्या घराचे स्वप्न पूर्ण करण्यासाठी सातत्याने मुंबई, ठाण्यासह राज्यभरातील विविध मंडळांतर्गत घरांची लाॅटरी काढली जाते. घर लागल्यानंतर त्यासाठी बँकांकडून गृहकर्ज घेण्याशिवाय त्यांच्याकडे पर्याय नसतो. संबंधित अर्जदाराने एनओसीकरिता ऑनलाईन अर्ज केला असता, त्याला तत्काळ एनओसी मिळणे आवश्यक असतानाही त्यास कागदोपत्री विलंब लागतो. त्याची दखल घेत म्हाडाचे उपाध्यक्ष संजीव जयस्वाल यांनी गृहकर्जाच्या एनओसीसाठी आलेल्या अर्जावर तत्काळ निर्णय घ्यावा, असे निर्देश दिल्याची माहिती म्हाडाच्या एका वरिष्ठ अधिकाऱ्याने दिली.
-----
थेट बँकेला ई-मेल जाणार
म्हाडाकडून गृहकर्जासाठी दिली जाणारी एनओसी अर्जदाराने दिलेल्या बँकेच्या ई-मेलवर थेट पाठवली जाणार आहे. तसेच त्याची प्रत अर्जदाराला दिली जाणार आहे. त्यामुळे एनओसीमध्ये फेरफार होण्याचा धोका पूर्णपणे कमी होणार आहे. तसेच सदरची एनओसी बँकेला ईमेलवर मिळणार असल्याने त्याची पुढील कार्यवाही तत्काळ करणे शक्य होणार आहे.