खारघर, ता. २५ (बातमीदार) : महर्षी दयानंद सरस्वती यांचा २००वा जन्मदिन व आर्य समाजाच्या १५०व्या स्थापना दिन कार्यक्रमाचे आयोजन शनिवारी (ता. २९) वाशी येथील सिडको एक्झिबिशन सेंटरमध्ये करण्यात आले आहे. आर्य समाजाच्या वतीने २९ आणि ३० मार्चला होणाऱ्या कार्यक्रमासाठी मुख्य पाहुणे म्हणून उपराष्ट्रपती जगदीप धनखड, गुजरातचे राज्यपाल आचार्य देवव्रत, मुख्यमंत्री देवेंद्र फडणवीस, उद्योगमंत्री पीयूष गोयल यांच्यासह विविध क्षेत्रांतील मान्यवर उपस्थित राहणार आहे.
जगात मानवसेवा आणि समाज सुधारणेसाठी स्थापन झालेला आर्य समाज ४० देशांत कार्यरत असून, आर्य समाजाच्या वतीने आर्य मंदिर, शाळा, गुरुकुल, अनाथ आश्रम, रुग्णालय मदत केंद्र, व्यायामशाळा, नशामुक्ती केंद्र सुरू आहे. आर्य समाजाचा १५०वा स्थापना दिवसानिमित्त वाशी येथील सिडको प्रदर्शन केंद्रात शनिवार आणि रविवारी (२९ आणि ३० मार्च) विविध कार्यक्रमांचे आयोजन करण्यात आले आहे. शनिवारी सकाळी ८ ते ११ या वेळेत शोभायात्रा, यज्ञ, ध्वजारोहण, दीपप्रज्वलन; तर सायंकाळी साडेआठ या वेळेत आर्य समाजाचा गौरवशाली इतिहास, वर्तमान आणि भविष्यातील आर्य समाज, सनातन संस्कृतीचा रक्षक आर्य समाज या विषयांवर मार्गदर्शन करण्यात येणार आहे. रविवारी सकाळी ९ ते सायंकाळी ८.३० या वेळेत युवाशक्तीचे मार्गदर्शक महर्षी दयानंद, नारीशक्तीचा प्रेरणास्रोत, राष्ट्र का रक्षक आर्य समाज आणि आर्य राष्ट्राचे आर्यवीर, वीरांगना आदी विषयांवर मार्गदर्शन केले जाणार आहे.