अंबरनाथ, ता. २५ (वार्ताहर) : नववीत शिकणाऱ्या एका १४ वर्षीय अल्पवयीन विद्यार्थिनीने राहत्या घरी गळफास घेऊन आत्महत्या केल्याची धक्कादायक घटना अंबरनाथमध्ये घडली आहे. याप्रकरणी अंबरनाथ पोलिस ठाण्यात अकस्मात मृत्यूची नोंद करून पुढील तपास सुरू केला आहे. दरम्यान, आत्महत्येचे कारण अद्याप समजू शकलेले नाही.
अंबरनाथ पश्चिम येथे भास्करनगर परिसरात रविवारी (ता. २३) संध्याकाळी ही घटना घडली. पॅटरीना राहुल बिस्ते या १४ वर्षीय विद्यार्थिनीने राहत्या घरात कोणीही नसताना गळफास घेऊन आत्महत्या केल्याचे समोर आले आहे. पॅटरीनाचे वडील राहुल यांची पत्नी सोडून गेली आहे. पॅटरीना ही तिची लहान बहीण, वडील, आजी अंजु यांच्यासोबत राहत होती. मात्र, ती रविवारी पंख्याला लटकलेल्या अवस्थेत दिसल्याने बिस्ते कुटुंबीयांनी तत्काळ जवळच्या खासगी रुग्णालयात उपचारासाठी दाखल केले. मात्र, डॉक्टरांनी तिला मृत घोषित केले. या घटनेची माहिती अंबरनाथ पोलिसांना मिळताच पोलिसांनी घटनास्थळी धाव घेत पाहणी केली. पॅटरीना हिला पुन्हा बी. जी. छाया या शासकीय रुग्णालयात उपचारासाठी दाखल केले. मात्र, डॉक्टरांनी रात्री साडेदहा वाजता तिला मृत घोषित करून शव विच्छेदनासाठी पाठवला. दरम्यान, याप्रकरणी अंबरनाथ पोलिस ठाण्यात अकस्मात मृत्यूची नोंद करून पोलिसांनी पुढील तपास सुरू केला आहे.