कुणाल कामराविरोधात पालघरमध्ये शिंदे गटाचे आंदोलन

पालघर, ता. २५ (बातमीदार) : स्टॅंडअप कॉमेडिअन कुणाल कामरा याने उपमुख्यमंत्री एकनाथ शिंदे यांच्याबाबत केलेल्या व्यंगात्मक टीकेनंतर महाराष्ट्रात ठिकठिकाणी आंदोलने होत आहेत. पालघर शहरातही शिवसेना पालघर जिल्ह्याच्या वतीने शिवाजी चौक येथे आज मंगळवारी (ता. २५) आंदोलन करण्यात आले. याप्रसंगी कुणाल कामराविरोधात जोरदार घोषणाबाजी करीत त्याच्या प्रतिमा जाळण्यात आल्या. पालघरचे पोलिस निरीक्षक अनंत पराड यांना शिवसेनेचे जिल्हाप्रमुख कुंदन संख्ये यांच्या नेतृत्वाखाली भेटून निवेदन देऊन गुन्हा दाखल करण्याची मागणी करण्यात आली. याप्रसंगी सोबत शिवसेनेचे सहसंपर्कप्रमुख केदार काळे, माजी आमदार मनीषा निमकर, शहरप्रमुख राहुल घरत, युवा सेना जिल्हाध्यक्ष कुणाल पाटील, साईराज पाटील यांच्यासह युवा सेना महिला सेना पदाधिकारी व शिवसैनिक मोठ्या संख्येने उपस्थित होते.