सकाळ वृत्तसेवा
डोंबिवली, ता. २५ : तालुकास्तरावर आयोजित राष्ट्रीय लोक अदालतीतून कल्याण व भांडुप परिमंडलातील कायमस्वरूपी वीजपुरवठा खंडित; तसेच वीजचोरीची दाखलपूर्व व प्रलंबित अशी पाच हजार ९२७ प्रकरणे तडजोडीद्वारे निकाली काढण्यात आली. महावितरणच्या उपलब्ध सवलतीचा लाभ घेत ग्राहकांनी सात कोटी ८६ लाख रुपयांचा भरणा केला.
कल्याण व भांडुप परिमंडलातील कायमस्वरूपी वीजपुरवठा खंडित केलेल्या; तसेच वीजचोरीची दाखलपूर्व व प्रलंबित प्रकरणे सामंजस्याने सोडवण्यासाठी लोकअदालतीत ठेवण्यात आली होती. कल्याण परिमंडलांतर्गत पाच हजार ६१८ प्रकरणांमध्ये तडजोड होऊ शकली. यात सात कोटी ५२ लाख रुपयांचा भरणा झाला. तर भांडुप परिमंडलांतर्गत ३३ लाख ३२ हजार रुपयांचा भरणा करणाऱ्या ३०९ ग्राहकांच्या प्रलंबित प्रकरणांचा निपटारा करण्यात आला. ठाणे, रायगड आणि पालघर जिल्हा विधी सेवा प्राधिकरणाच्या सहकार्याने; तसेच भांडुप परिमंडलाचे मुख्य अभियंता सुनील काकडे व कल्याण परिमंडलाचे मुख्य अभियंता चंद्रमणि मिश्रा यांच्या मार्गदर्शनाखाली अधीक्षक अभियंते, महावितरणच्या विधी विभागाने लोकअदालत यशस्वी करण्यासाठी विशेष प्रयत्न केले.