अपघातात रिक्षाचालक जखमी
सकाळ वृत्तसेवा
ठाणे, ता. २५ : चालकाचे नियंत्रण सुटल्याने कंटेनरने रिक्षाला धडक दिली. या घटनेत रिक्षाचालक धीरजकुमार मेहता (४२) हा जखमी झाला आहे. ही घटना मंगळवारी (ता. २५) दुपारी पातलीपाडा उड्डाणपुलावर घडली. यामुळे ठाण्याकडून घोडबंदरकडे जाणारी वाहतूक सुमारे ४० मिनिटे धीम्या गतीने सुरू होती. अपघातग्रस्त वाहने बाजूला केल्यावर वाहतूक पूर्वपदावर आल्याची माहिती आपत्ती व्यवस्थापन अधिकाऱ्यांनी दिली. न्हावाशेवा येथे कंटेनर घेऊन चालक शोहेब अत्तर हा घोडबंदर रोडमार्गे सुरत येथे निघाला होता. याचदरम्यान पातलीपाडा उड्डाणपुलावर चालकाचे गाडीवरील नियंत्रण सुटले व पुढे असलेल्या रिक्षावर जाऊन धडकला. या घटनेची माहिती मिळताच घटनास्थळी आपत्ती व्यवस्थापन आणि कासारवडवली पोलिसांनी धाव घेतली. त्यावेळी रिक्षाचालक जखमी झाल्याचे समोर आले. या अपघाताने वाहतुकीवर परिणाम झाल्याने तातडीने अपघातग्रस्त वाहने रस्त्याच्या एका बाजूला करण्यात आली.