महिलेला १५ लाखांचा गंडा
‘मेडिकल’ला प्रवेश देण्याच्या बहाण्याने फसवणूक
भाईंदर, ता. २५ (बातमीदार) : वैद्यकीय महाविद्यालयात प्रवेश मिळवून देण्याच्या बहाण्याने मिरा रोड येथील महिलेची तब्बल १५ लाख रुपयांची फसवणूक करण्यात आली. याप्रकरणी नयानगर पोलिस ठाण्यात गुन्हा दाखल करण्यात आला आहे.
मिरा रोड येथील महिलेचा दीड वर्षांपासून मुलासाठी चांगल्या वैद्यकीय महाविद्यालयाचा शोध सुरू होता. ऑगस्ट २०२३ मध्ये त्यांना आदित्य कश्यप नामक व्यक्तीचा फोन आला. त्याने विविध वैद्यकीय महाविद्यालयांची नावे आणि शुल्काची माहिती पाठवली. त्यापैकी बंगळूर येथील एम. एस. रमैय्या इन्स्टिट्यूट या महिलेला पसंत पडले. पहिल्या व दुसऱ्या वर्षासाठी एकूण २० लाख शुल्क असल्याचे सांगत कश्यपने मुलाची कागदपत्रे मागवून घेतली आणि पैशांची मागणी केली; मात्र महिलेने आम्ही थेट महाविद्यालयात पैसे भरू, असे सांगितले. त्यावर प्रवेश प्रक्रिया मी करणार असल्याने पैसे माझ्याच खात्यात पाठवा, असे सांगत बँक खाते क्रमांक पाठवले. महिलेने या खात्यावर गेल्या वर्षभरात १४ लाख ८९ हजार रुपये पाठवले. त्यानंतर कश्यपने एम. एस. रमैय्या महाविद्यालयाचे प्रवेशपत्र पाठवले आणि उर्वरित चार लाख रुपयांची मागणी केली.
----
आरोपीचा शोध सुरू
महिलेने महाविद्यालय सुरू होण्याची तारखेबाबत तसेच प्राध्यापकांशी बोलणे करून देण्याची मागणी केली असता, कश्यपने उडवाउडवीची उत्तरे दिली. त्यानंतर कश्यपने फोन स्वीकारणे बंद केले. अखेर आपली फसवणूक झाल्याचे लक्षात येताच महिलेने नयानगर पोलिस ठाण्यात सोमवारी (ता. २४) आदित्य कश्यपविरोधात तक्रार दाखल केली. पोलिसांनी गुन्हा दाखल केला असून पोलिस आरोपीचा शोध घेत आहेत.