उल्हासनगर, ता. २७ (वार्ताहर) : सिंधी समाजाच्या नववर्ष ‘चेटीचंड’च्या पूर्वसंध्येला उल्हासनगरच्या रस्त्यांवर सिंधी एकतेचा जल्लोष पाहायला मिळणार आहे. उल्हासनगर-१ येथील रिजेन्सी एंटीलिया येथून शनिवारी (ता. २९) सकाळी १० वाजता सुरू होणारी ‘महाबाईक रॅली’ उल्हासनगर-५ मधील जय झूलेलाल प्रवेशद्वार येथे समारोपास येणार आहे.

सिंधी संस्कृती, परंपरा आणि सामूहिक एकतेचे प्रतीक ठरणाऱ्या या रॅलीत शहरातील हजारो युवक, महिला, व्यापारी व सामाजिक संस्था सहभाग घेणार आहेत. शहरातील प्रत्येक चौकात उत्सवाचे वातावरण पाहायला मिळणार आहे. रॅलीच्या सुरुवातीला एंटीलिया येथे पारंपरिक बहराणा साहेबचे पूजन होणार आहे. त्यानंतर भक्तिगीत, भजन कीर्तन व प्रसाद वितरणाची व्यवस्था असेल. साई झूलेलाल यांच्या चरणी ही श्रद्धांजली अर्पण करत संपूर्ण रॅलीत जय झूलेलालच्या घोषणांनी वातावरण भक्तिमय होणार आहे. ही रॅली सलग चौथ्या वर्षी आयोजित करण्यात येत आहे. सिंधी समाजाच्या सांस्कृतिक अभिमानाचे प्रतीक म्हणून तिच्याकडे पाहिले जाते.
यंदाची रॅली अधिक भव्य स्वरूपात पार पडणार असून, संपूर्ण मार्गावर व्यापाऱ्यांकडून पुष्पवृष्टीसह रॅलीचे भव्य स्वागत करण्यात येणार आहे. रॅलीचे आयोजन महेश सुखरामानी, भारत गंगोत्री, शंकर नागरानी, हीरो बोधा, अनिल बठिजा, सोनू विशनानी व इतर कार्यकर्त्यांनी केले आहे. या वेळी शहरातील युवक बाईकर्स, व्यापारी संघटना, डान्स क्लब्स, योगा ग्रुप्स, कराओके क्लब, सिंधी कलाकार, महिला मंडळ आणि विविध सामाजिक संस्थांनी मोठ्या संख्येने सहभागी व्हावे, असे आवाहन करण्यात आले आहे.

रॅलीचा मार्ग :
रिजेन्सी एंटीलिया-बिर्ला गेट -बस स्थानक -गोल मैदान -निरंकारी हॉल -नेहरू चौक -फर्निचर बाजार -शिवाजी चौक -शास्त्री चौक सेक्शन १७ -हीरा घाट -पवई चौक -उल्हासनगर-४ मेन बाजार -शहीद हेमू कालानी चौक सेक्शन २५ -नेताजी चौक -गांधी रोड -उल्हासनगर-५ मुख्य बाजार -चालीहा साहिब -दूध नाका -जय झूलेलाल प्रवेशद्वार, कैलाश कॉलनी.