‘एसआरए’चे रखडलेले
तीन प्रकल्प म्हाडाकडे
सकाळ वृत्तसेवा
मुंबई, ता. २८ : म्हाडाच्या भूखंडावरील वर्षानुवर्षे रखडलेले तीन एसआरए प्रकल्प म्हाडाने पूर्ण करावे म्हणून झोपडपट्टी पुनर्विकास प्राधिकरणाने मंजुरी दिली आहे. त्यामुळे संबंधित तिन्ही एसआरए योजना पूर्ण करून संबंधित रहिवाशांना हक्काचे घर देणे म्हाडाला शक्य होणार आहे.

आर्थिक निधीची चणचण, रहिवाशांचे थकीत भाडे अशा वेगवगेळ्या कारणांमुळे मुंबईतील अनेक एसआरए प्रकल्प रखडलेले आहेत. त्या पार्श्वभूमीवर राज्य सरकारने रखडलेले एसआरए प्रकल्प म्हाडा, एसआरए, सिडको अशा सरकारी संस्थांच्या मादतीने मार्गी लावण्याचे निर्देश एसआरएला दिले होते. त्यानुसार म्हाडाने एकूण २१ प्रकल्प ताब्यात घेण्याबाबत एसआरएशी पाठपुरावा सुरू केला होता. त्यानुसार एसआरएने जोगेश्वरी येथील साईबाबा सहकारी गृहनिर्माण संस्था, कुर्ला नेहरूनगर येथील श्रीमकनगर संस्था व चेंबूर येथील जागृती संस्था हे तीन प्रकल्प म्हाडाला देण्यास मंजुरी दिली आहे. तसेच उर्वरित १८ प्रकल्प घेण्याबाबत प्रस्ताव सादर करण्याचे सूचित केले आहे.