मुंबई आरक्षण प्रणाली चार तास बंद राहणार

मुंबई, ता. २८ : रेल्वेच्या तांत्रिक देखभालीच्या कामामुळे मुंबई पॅसेंजर रिझर्व्हेशन प्रणाली (पीआरएस) काही काळासाठी बंद राहणार आहे. २९ मार्चला रात्री ११.४५ वाजल्यापासून ३० मार्चला पहाटे ३.४५ वाजेपर्यंत ही सेवा उपलब्ध राहणार नाही.
या कालावधीत प्रवासी आरक्षण, चालू तिकीट बुकिंग, रिफंड प्रक्रिया, आयव्हीआरएस, टच स्क्रीन सेवा आणि रिफंड काउंटर बंद राहणार आहेत. तसेच मुंबई पीआरएसअंतर्गत गाड्यांसाठी ऑनलाइन तिकीट बुकिंगही होणार नाही. प्रवाशांच्या सुविधेसाठी प्रचलित नियमांनुसार टीडीआर जारी करून परताव्याची प्रक्रिया सुरू राहील, असे मध्य रेल्वेने स्पष्ट केले आहे. प्रवाशांनी या तांत्रिक प्रक्रियेची नोंद घ्यावी आणि पर्यायी व्यवस्थेचा विचार करावा, असे आवाहन रेल्वे प्रशासनाकडून करण्यात आले आहे.