नेरूळ, ता. ३० (बातमीदार) : पारंपरिक नऊवारी साडी, नथ, ब्रँडेड गॉगल, रंगीबेरंगी फेटे परिधान करून दुचाकीवर स्वार झालेल्या महिलांचे पथक, संस्कार भारती रांगोळ्या आणि लहान मुलांनी केलेली महापुरुषांची वेशभूषा हे सर्व सांस्कृतिक चित्र बेलापुरातील नववर्ष शोभायात्रेनिमित्त नवी मुंबईकरांना अनुभवायला मिळाले. महिलांनी ढोल-ताशाच्या आवाजावर ताल धरून लेझीम खेळत या शोभायात्रेत भाग घेतला.
गुढीपाडव्यानिमित्त सीबीडी बेलापूर सेक्टर १५ येथील साई रेसिडेन्सीमध्ये नववर्ष स्वागत यात्रेचे आयोजन करण्यात आले होते. या वेळी ढोल-ताशा पथकाने उत्कृष्ट सादरीकरण केले. लहान मुलांसाठी ऐतिहासिक व्यक्तिमत्त्व व थोर नेते या थीमनुसार फॅन्सी ड्रेस स्पर्धा आयोजित केली होती. यामध्ये सर्वोत्कृष्ट पोषाखासाठी आकर्षक बक्षिसे देण्यात आली. लहान मुलांपासून ते वृद्धांपर्यंत सर्वांनीच पारंपरिक पोशाख परिधान करून या शोभायात्रेत सहभाग घेतला. शोभायात्रेची सुरुवात बेलापूर सेक्टर १५ येथील साई रेसिडेन्सीपासून झाली व समारोप सेक्टर १५ येथील मारुती पॅराडाइज येथे करण्यात आला. या शोभायात्रेचे आयोजन राधिका शिंदे, स्वप्नील कोलटकर, अजय ठाकूर, गायत्री दळवी, धनश्री शिंदे, जानवी शिंदे यांनी केले होते.