तुर्भे, ता. ३० (बातमीदार) : विश्वनाथ कृष्णाजी सामंत ट्रस्टच्या वतीने रविवारी (ता. ३०) सकाळी श्री रामतनु मंदिर परिसरात गुढी उभारून गुढीपाडवा साजरा करण्यात आला. गुढी उभारल्यानंतर श्री रामतनु मंदिराकडून शोभायात्रेला सुरुवात झाली. शोभायात्रेत महिला पारंपरिक वेशभूषा परिधान करून मोठ्या संख्येने सहभागी झाल्या होत्या. लहान मुलांच्या वेशभूषेने सर्वांचे लक्ष वेधले होते. शोभायात्रा हनुमान मंदिराजवळ आल्यावर महिलांनी संगीताच्या तालावर फेरा धरला. शिस्तबद्ध पद्धतीने यात्रेची श्री रामतनु मंदिरात सांगता करण्यात आली. शोभायात्रा समाप्तीनंतर अखंड रामनाम गजर, रामरक्षा सहस्रवर्तने, तसेच शांता महिला मंडळाच्या वतीने हरिपाठ आणि भजनाचा कार्यक्रम झाला. गुढीपाडव्याचा उत्सव साजरा करण्यासाठी सुजाता सामंत, लता पाटील, सारिका म्हात्रे, आशा म्हात्रे, कल्पना भोईर, रजनी पाटील, अनिता ठाकूर, मनीषा क्षीरसागर, सुरेखा पाटील व जयश्री पाटील आदी महिलांचा मोठा सहभाग होता. विश्वनाथ कृष्णाजी सामंत ट्रस्टचे अध्यक्ष मोहन सामंत व तुर्भे ग्रामदेवस्थान ट्रस्टचे अध्यक्ष लक्ष्मण पाटील यांनी या कार्यक्रमासाठी विशेष मेहनत घेतली. एपीएमसी पोलिस ठाण्याचे वरिष्ठ पोलिस निरीक्षक अजय शिंदे यांनी चोख बंदोबस्त ठेवला होता.