कल्याण, ता. ३० (बातमीदार) : कल्याण रेल्वेस्थानकाकडून महापालिकेच्या पाणीपट्टीचे तब्बल चार कोटी ४१ लाख थकवण्यात आले हाेते. याप्रकरणी स्थानकाला महापालिकेकडून केला जाणारा पाणीपुरवठा १२ तासांहून अधिक काळासाठी खंडित करण्यात आला. रेल्वे प्रशासनाने एक कोटीचा कर भरण्याची तयारी दाखवल्यावर पाणीपुरवठा सुरळीत करण्याचा निर्णय महापालिकेने घेतला.

कल्याण रेल्वेस्थानकासह रेल्वेच्या विविध आस्थापनांना मिळून कल्याण-डोंबिवली महापालिकेने ११ नळजोडण्या पुरवल्या आहेत. यात आंबिवली, टिटवाळा येथील रेल्वे आस्थापनांचाही समावेश आहे. या सर्व नळजोडण्यांचे पाणीदेयक गेल्या अनेक महिन्यांपासून थकले असून, त्याची रक्कम आठ कोटींहून अधिक असल्याचे वृत्त ‘सकाळ’मध्ये २३ मार्चला प्रसिद्ध केले होते, मात्र त्या वेळी रेल्वेने माेठी थकबाकी नसल्याचे स्पष्ट करत एप्रिलमध्ये रेल्वेकडून पाणीपट्टी भरणा केला जातो, असे स्पष्ट केले होते. वृत्त प्रकाशित झाल्यावर महापालिका प्रशासनाने रेल्वेवर कारवाई केली. या कारवाईमुळे कल्याण रेल्वेस्थानकातील पाणीपुरवठा काही वेळेसाठी खंडित झाल्याने रेल्वेस्थानकातील अधिकारी, कर्मचाऱ्यांची तारांबळ उडाली.

रेल्वे प्रशासनाकडून नमते
कल्याण-डोंबिवली महापालिकेतील अधिकाऱ्यांनी ‘सकाळ’सोबत बोलताना स्पष्ट केले की, फक्त कल्याण रेल्वेस्थानक परिसरातीलच रेल्वेच्या आस्थापनांचे चार कोटी ४१ लाख थकवल्याबद्दल ही कारवाई आहे. शनिवारी (ता. २९) कल्याण रेल्वेस्थानकाला पाणीपुरवठा करणारे पाण्याचे दोन वॉल्व्ह बंद करण्यात आले, मात्र त्यानंतर मध्य रेल्वेच्या विभागीय व्यवस्थापकांनी सरकारकडे पाठपुरावा करून एक कोटीचा कर भरण्याची तयारी दर्शविली आहे. तसेच उर्वरित रक्कम भरण्याबाबत महापालिका आणि रेल्वे अधिकारी यांची बैठक पार पडल्यानंतर निर्णय होईल, मात्र लवकरच रेल्वेचा पाणीपुरवठा सुरळीत करण्यात येणार आहे.