अंबरनाथ, ता. ३० (वार्ताहर) : हॉटेलसमोर पार्क केलेली दुचाकी चोरून नेल्याची घटना अंबरनाथमध्ये नुकतीच घडली होती. अखेर एक महिन्यानंतर या आरोपीला पोलिसांनी बेड्या ठोकल्या असून, दुचाकीही हस्तगत करण्यात आली.

अंबरनाथ पश्चिमेला कल्याण-बदलापूर महामार्गालगतच्या एका हॉटेलसमोर नजीर अहमद खान (६०) यांनी आपली दुचाकी उभी करून ठेवली होती. ते काही कालावधीसाठी हॉटेलमध्ये गेले होते. याच वेळी चोरट्याने त्यांची दुचाकी चोरून फरार झाला होता. ही घटना २ फेब्रुवारीला रात्री साडेदहाच्या दरम्यान घडली होती. या संदर्भात नजीर खान यांनी अंबरनाथ पोलिस ठाण्यात धाव घेत गुन्हा दाखल केला होता. घटनेच्या अनुषंगाने पोलिसांचा तपास सुरू असताना गुप्तहेरामार्फत पोलिसांना बातमी मिळाली होती. या माहितीच्या आधारे पोलिसांनी सापळा रचत आरोपी अकिल मुनिर खान (वय ३७) याला बेड्या ठोकल्या आहेत. त्याच्याजवळून महागडी दुचाकी हस्तगत करण्यात पोलिसांना यश आला आहे. दरम्यान, आरोपीला न्यायालयात हजर केले असता एक दिवसाची पोलिस कोठडी सुनावण्यात आल्याची माहिती पोलिस निरीक्षक किशोर शिंदे यांनी दिली आहे.