पुरणपोळी महोत्सवातून महिलांचे आर्थिक सशक्तीकरण
५० बचत गटांकडून साडेतीन हजारांहून अधिक पोळ्यांची विक्री

मुंबई, ता. ३१ : मराठी नववर्षाच्या शुभमुहूर्तावर बृहन्मुंबई महापालिका अर्थसहाय्यित महिला बचत गटांनी पुरणपोळी महोत्सव सुरू केला. याला मुंबईकरांनी चांगला प्रतिसाद दिला. ५० बचत गटांनी मिळून साडेतीन हजारांपेक्षा अधिक पुरणपोळ्यांची ऑनलाइन विक्री केली. विशेष म्हणजे या सर्व पुरणपोळ्या घरपोच मिळाल्याने मुंबईकरांनी बचत गटांच्या या सेवेचे कौतुक केले.

बृहन्मुंबई महापालिकेने अर्थसहाय्य केलेल्या ५० बचत गटांना एकत्र आणून गुढीपाडव्यासाठी ‘पुरणपोळी महोत्सव’ उपक्रम राबविण्यात आला. पुरणपोळी खरेदीसाठी https://shgeshop.com या संकेतस्थळावर सुविधा उपलब्ध करून दिली होती. संकेतस्थळावर नोंदणी केल्यावर नजीकच्या चार किलोमीटर परिसरातील महिला बचत गटाकडे याची नोंद झाली. त्यानंतर मागणी नोंदविलेल्या मुंबईतील ग्राहकांना पुरणपोळी घरपोच उपलब्ध करून देण्यात आली.
महिलांच्या आर्थिक सशक्तीकरणासाठी बृहन्मुंबई महापालिका महिलांना वेगवेगळे व्यासपीठ उपलब्ध करून देत असते. त्यामुळे बचत गटांना विविध माध्यमातून रोजगार उपलब्ध होतो. त्याचाच एक भाग म्हणून यंदा गुढीपाडव्याच्या मुहूर्तावर विविध बचत गटांना पुरणपोळी महोत्सवात सहभागी करून घेण्यात आले. या उपक्रमाला मिळालेल्या उत्तम प्रतिसादामुळे या सर्व बचत गटांचा हुरूप अधिक वाढला आहे.

व्यावसायिक नियोजन
पुरणपोळी महोत्सवातील ५० बचत गटांनी एसएचजी ई शॉप या संकेतस्थळाद्वारे घरपोच पुरणपोळी पुरविण्याची सुविधा उपलब्ध करून दिली. महापालिकेच्या नियोजन विभागाने या उपक्रमासाठी पूर्वतयारी केली होती. संबंधित बचत गटातील महिलांना व्यावसायिक प्रशिक्षण दिले होते. आपल्याकडे आलेली मागणी कशा पद्धतीने नोंद करून ठेवायची. त्यानंतर दर्जा आणि स्वच्छतेचे सर्व नियम पाळून स्वादिष्ट पुरणपोळी ग्राहकाला कशी घरपोच पाठवायची, याबाबतही नियोजन विभागाने बचत गटातील महिलांना नि:शुल्क मार्गदर्शन केले. आपल्या उत्पादनांना बाजारपेठ कशी उपलब्ध मिळू शकते, बाजारात मागणी असल्यास त्या पद्धतीने पुरवठा कसा करावा, याचेही प्रशिक्षण बचत गटांना देण्यात आले होते.

कलाकारांकडूनही प्रतिसाद
एसएचजी ई शॉप (shgeshop) या संकेतस्थळावर मुंबईतील बचत गटांनी तयार केलेले असंख्य पदार्थ, वस्तू उपलब्ध असून, मुंबईकरांनी त्या आवर्जून खरेदी कराव्यात, असे आवाहन संचालक (नियोजन) डॉ. प्राची जांभेकर यांनी बृहन्मुंबई महागरपालिका प्रशासनाच्या वतीने केले आहे. गायिका अनुराधा पौडवाल यांनीदेखील या ऑनलाइन पुरणपोळी महोत्सवात मागणी नोंदवली होती. बचत गटांनी त्यांना घरपोच पुरणपोळी दिली. या सेवेमुळे पौडवालदेखील भारावल्या.