ठाणे जिल्ह्यात पाऊस, धुळीचे वादळ
जनजीवन विस्कळित; पालघर, रायगडला अवकाळीचा तडाखा
सकाळ वृत्तसेवा
डोंबिवली, ता. ४ : ठाणे, पालघर आणि रायगड जिल्ह्यांना शुक्रवारी (ता. ४ ) दुपारी अचानक अवकाळी पावसाने तडाखा दिला. ठाणे जिल्ह्यात शहापूर, मुरबाड, उल्हासनगर परिसरात वादळीवार्यांसह पाऊस झाला. त्याचवेळी ठाणे शहरासह कल्याण-डोंबिवली, कल्याण ग्रामीण, भिवंडी, अंबरनाथ, बदलापूर परिसरात धुळीचे वादळ आल्याने पादचाऱ्यांसह वाहनचालकांची एकच तारांबळ उडाली. अचानक आलेल्या पावसाने सर्वसामान्यांना उकाड्यापासून दिलासा मिळाला.

राज्यात विविध भागांत ढगाळ वातावरण तसेच अवकाळी पावसाचा अंदाज हवामान खात्यातर्फे वर्तवण्यात आला होता. ठाणे, कल्याण, डोंबिवली, अंबरनाथ, बदलापूर आणि आसपासच्या ग्रामीण परिसरात रविवारी सकाळपासूनच ढगाळ वातावरण होते. त्यातच दुपारी चार वाजता अचानक सुटलेल्या सोसाट्याच्या वाऱ्यामुळे ठाणे जिल्हातील शहर आणि ग्रामीण परिसराला काही वेळ धुळीने वेढले होते. त्यामुळे वातावरणातील दृश्‍यमानता कमी झाली होती. कल्याणजवळ आंबिवली स्थानक परिसरात झाड कोसळून पाच दुचाकींचे नुकसान झाले. शहापूरजवळ मुंबई-नाशिक मार्गावर विजेच्या तारा रस्त्यावर पडल्याने या मार्गावरील वाहतूक काही वेळ थांबली होती, तर तानशेत रेल्वेस्थानकात वाऱ्यामुळे लोकलवर पत्रा पडल्याची घटना घडली. ठाणे शहरात सोसाट्याच्या वाऱ्यामुळे काही ठिकाणी झाडांच्या फांद्या उन्मळून पडल्या होत्या.

बंगालच्या उपसागरावरून येणारे बाष्पयुक्त वारे आणि ओडिशापासून तमिळनाडूपर्यंत हवेची द्रोणीय स्थिती निर्माण झाल्यामुळे पुढील पाच दिवस राज्यात ढगाळ वातावरण आणि वादळी वाऱ्यासह अवकाळी पावसाचा अंदाज हवामान विभागाने वर्तवला आहे. या पार्श्वभूमीवर शुक्रवारी सकाळपासूनच ढगाळ वातावरण होते. सायंकाळी चारच्या सुमारास वतावरणात अचानक बदल होऊन वादळी वारा सुरू होऊन सर्वत्र धुळीचे साम्राज्य पसरले होते.
----