अवकाळीने मोखाड्यात आंबा, काजूचे नुकसान
मोखाडा, ता. ४ (बातमीदार) : मोखाड्यात अवकाळी वादळी पावसाने धुमाकूळ घातला आहे. त्यामुळे आंबा आणि काजू बागायतदारांचे मोठे नुकसान झाले आहे. पालघर जिल्ह्यातील मोखाडा तालुक्यात शुक्रवारी दुपारनंतर अवकाळी, वादळी वाऱ्यासह विजेच्या कडकडाटात पावसाने हजेरी लावली. या वादळी पावसाने काढणीस आलेला आंबा आणि काजू फळाचे नुकसान झाल्याने बागायतदार शेतकरी हवालदिल झाले आहेत. तर खोडाळा-विहीगाव रस्त्यावर मोहिते महाविद्यालयाजवळ झाड उन्मळून या मार्गावरील वाहतूक ठप्प झाली आहे. तसेच वीजपुरवठादेखील खंडित झाल्याने जनजीवन विस्कळित झाले आहे. दरम्यान, वादळी पावसामुळे दुधगाव, वाशिंद, जोगलवाडी आणि राजेवाडी येथे अनेक घरांवरील छप्पर ऊडवली असुन घरांची पडझड ही झाली आहे.