नळ पाणी योजनेतील दिरंगाईप्रकरणी कारवाई करा
किसल पारगाव नळ पाणी योजनेत फसवणूक
मुरबाड, ता. ६ (बातमीदार) : तालुक्यातील किसल पारगाव नळ पाणी योजनेच्या अंमलबजावणीमध्ये दिरंगाई व शासनाची फसवणूक करणाऱ्या ठेकेदारांविरुद्ध कारवाई करण्याची मागणी नागरिकांनी केली आहे. जिल्हास्तरीय अधिकारी, सामाजिक कार्यकर्ते व नागरिक यांच्या संयुक्त समितीच्या माध्यमातून या योजनेची सखोल चौकशी करण्याची मागणी करण्यात आली आहे. २४ मार्च अखिल भारतीय किसान सभा मुरबाड तालुका समितीच्या वतीने ‘शुद्ध पाणी द्या’ आंदोलन करण्यात आले होते. त्यामुळे पाणीपुरवठा विभागाच्या वतीने २६ मार्च रोजी पारगाव येथील पाणी योजनेचा पंचनामा करण्यात आला. या वेळी अनेक गोष्टींमध्ये फसवणूक केल्याचे उघड झाले.
अखिल भारतीय किसान सभेच्या आंदोलनामुळे या विभागाला जाग आल्याचे मुरबाड तालुका समिती अध्यक्ष लक्ष्मण भांडे व जगदीश भालके यांनी सांगितले.
पाणी योजनेसाठी टाकीचे बांधकाम करण्यात येईल अन्यथा तो निधी इतर कामासाठी वापरता येणे शक्य असल्याची माहिती पाणीपुरवठा विभागाचे उप अभियंता जगदीश बनकरी यांनी दिली.
---------------------------------
पाणीपुरवठा योजनेच्या कामाला सुरुवात झाल्यानंतर तब्बल चार वर्षांनी पाण्याच्या टाकीसाठी दानपत्र दिले नसल्याचे कारण देऊन पाणीपुरवठा टाकी बांधकाम करता आले नाही, असे पत्र पाणीपुरवठा विभागाने ग्रामपंचायतीला दिले आहे. चार वर्षांत यासंबंधी पाठपुरावा का करण्यात आला नाही, असा सवाल किसल पारगावच्या सरपंच कविता वारे यांनी केला आहे.