मुरबाड (बातमीदार)ः मुरबाड तालुक्यात सध्या ४२ अंशापेक्षा जास्त तापमान नोंदवले जात आहे. अशा तापमानात अशक्तपणा, चक्कर किंवा ताप येणे अशी लक्षणे दिसत असल्याने नागरिकांनी पुरेशी काळजी घ्यावी, असे आवाहन मुरबाड पंचायत समितीचे तालुका आरोग्य अधिकारी डॉक्टर श्रीधर बनसोडे यांनी केले आहे. प्राथमिक आरोग्य केंद्रातील डॉक्टरांना उष्माघात झालेल्या रुग्णांच्या औषधोपचारांसाठी प्रशिक्षण शिबिरावेळी ते बोलत होते. या वेळी शरीरात पाणी कमी होऊ नये म्हणून भरपूर पाणी प्यावे, गरज असेल तरच बाहेर पडावे, डोक्यावर टोपी घालावी, हलक्या रंगाचे तसेच सुती कपडे घालावे, डोळ्यांसाठी गॉगलचा वापर करावा, असे आवाहन करण्यात आले.