सिडकोच्या दरवाढीविरोधात मनसेचे चित्र प्रदर्शन
वाशी, ता. ९ (वार्ताहर) : सिडकोने ऑक्टोबर २०२४ मध्ये जाहीर केलेल्या घरांच्या लॉटरीत आर्थिकदृष्ट्या दुर्बल व अल्प उत्पन्न गटासाठी असलेल्या घरांच्या किमती ५० लाख ते एक कोटी रुपयांदरम्यान ठेवण्यात आल्यामुळे नागरिकांमध्ये तीव्र नाराजी पसरली आहे. या दरवाढीविरोधात महाराष्ट्र नवनिर्माण सेना आणि सिडको सोडतधारक गेल्या काही महिन्यांपासून सातत्याने आंदोलन करीत आहेत. तर आता मनसेच्या वतीने वाशीमध्ये या दरवाढीविरोधात चित्र प्रदर्शन भरविण्यात येणार आहे.
सिडको घरांच्या वाढत्या किमतीविरोधात मनसेकडून मागील काही दिवसांत आंदोलन करण्यात येत आहे. यामध्ये मानवी साखळी, पोस्ट कार्ड आंदोलन आणि इंजेक्शन मोर्चा यांसारख्या लोकशाही मार्गांचा अवलंब करूनही सिडको प्रशासन आणि राज्य सरकारकडून कोणताही ठोस निर्णय घेण्यात आलेला नाही. याच पार्श्वभूमीवर मनसे आणि सिडको लॉटरी विजेत्यांकडून येत्या रविवारी (ता. १३) वाशीतील महात्मा जोतिबा फुले स्मृती भवन येथे भव्य चित्र प्रदर्शनाचे आयोजन करण्यात आले आहे. मागील वर्षी तत्कालीन सिडको अध्यक्ष संजय शिरसाट यांनी घरांचे दर २० ते २५ टक्क्यांनी कमी करण्याची घोषणा केली होती, तर मंत्री उदय सामंत यांनीही विधानमंडळात सरकारची भूमिका घरांचे दर कमी असावेत, अशी असल्याचे सांगितले होते; मात्र अद्याप राज्य सरकार आणि सिडकोकडून कोणतीही ठोस कार्यवाही झालेली दिसत नसल्याने दरवाढीविरोधात चित्र प्रदर्शन भरविण्यात आल्याचे मनसेचे शहराध्यक्ष गजानन काळे यांनी सांगितले.
..........
प्रदर्शन स्थळ :
महात्मा जोतिबा फुले स्मृती भवन,
स्वामी विवेकानंद कम्युनिटी हॉल,
भूखंड क्र. १२ व १३, वाशी पोलिस ठाणेशेजारी,
सेक्टर - ३, वाशी, नवी मुंबई.
वेळ : सकाळी १० ते संध्याकाळी ६