भारतील नौदलाची सामर्थ्यशक्ती वाढणार
२६ राफेल मरीन विमाने खरेदीस केंद्राची मान्यता
सकाळ वृत्तसेवा
मुंबई, ता. ९ : भारतीय नौदलाच्या हवाई सामर्थ्यात अधिक वाढ होणार आहे. नौदलासाठी २६ राफेल मरीन लढाऊ विमानांच्या खरेदीला केंद्र सरकारने मंजुरी दिली आहे. यासाठी अंदाजे ६३ हजार कोटी रुपयांचा करार लवकरच होणार असल्याची माहिती सूत्रांनी दिली. फ्रान्सच्या डसॉल्ट एव्हिएशनकडून ही लढाऊ विमाने खरेदी केली जाणार आहेत.
नौदलाच्या ताफ्यात २२ सिंगल-सीटर विमाने तर प्रशिक्षणासाठी ४ ट्विन-सीटर विमाने सहभागी होणार आहेत. ही विमाने ‘आयएनएस विक्रांत’ आणि ‘आयएनएस विक्रमादित्य’ या भारतीय विमानवाहू नौकांवर तैनात केली जातील. सध्या या नौका मिग-२९ के विमानावर अवलंबून आहेत. या विमानांच्या कार्यक्षमतेबाबत वेळोवेळी चिंता व्यक्त करण्यात आली. नौदलाच्या या विमान खरेदीच्या प्रस्तावाला अंतिम रूप देण्यासाठी पंतप्रधान नरेंद्र मोदी यांच्या नेतृत्वाखालील कॅबिनेट कमिटी ऑन सिक्युरिटीकडून (सीसीएस) लवकरच मंजुरी मिळणे अपेक्षित आहे. ती मिळाल्यानंतर करारावर स्वाक्षऱ्या होतील आणि विमानांची निर्मिती प्रक्रिया सुरू होईल.
---
कधी येणार ताफ्यात?
सूत्रांनी दिलेल्या माहितीनुसार, करारावर स्वाक्षऱ्या झाल्यानंतर जवळपास पाच वर्षांनी म्हणजे २०२९च्या अखेरपर्यंत ती भारतात येण्यास सुरुवात होईल. संपूर्ण २६ विमाने येण्यास २०३१ पर्यंत प्रतीक्षा करावी लागणार आहे.
----
हवाई सामर्थ्य वाढणार

बहुउद्देशीय क्षमता असलेल्या राफेल मरीन लढाऊ विमानातून हवेतील, जमिनीवरील तसेच समुद्रातील लक्ष्यावर अचूक प्रहार करता येतो. यामध्ये मेटेओर, एमआयसीए आणि स्कॅल्पसारखी अत्याधुनिक क्षेपणास्त्रे, तर स्पेक्ट्रासारखी अत्याधुनिक इलेक्ट्रॉनिक संरक्षण प्रणाली आहे. सध्या कार्यरत असलेली रशियन बनावटीची मिग २९ के विमाने कालबाह्य झाल्याने त्यात अनेक तांत्रिक अडचणी येत आहेत. आता राफेल मरीन विमानांमुळे आयएनएस विक्रांत आणि विक्रमादित्यची लढाऊ क्षमता वाढणार आहे.
----
मुख्य वैशिष्ट्ये :
- विमानवाहू युद्धनौकेवरून उड्डाणाची क्षमता
- हवा, जमीन आणि समुद्रावर एकाच वेळी हल्ला करण्याची क्षमता
- वाईट हवामानातही सहज उड्डाण करण्याची क्षमता
- शत्रूच्या रडारपासून स्वतःला लपवण्याची क्षमता
........
क्षेपणास्त्रांची वैशिष्ट्ये
मेटेओर क्षेपणास्त्र - १५० किमीपेक्षा अधिक अंतरावर हल्ला
एमआयसीए क्षेपणास्त्र - हवेतील लक्ष्यावर अचूक हल्ला
स्कॅल्प क्रूझ मिसाइल - जमिनीवर लांब पल्ल्याच्या लक्ष्यावर हल्ला
स्पेक्ट्रा प्रणाली - शत्रूच्या हल्ल्यापासून संरक्षण
.........
तांत्रिक वैशिष्ट्ये
गती - ताशी १,९१२ किमी
वजन - २४.५ टन
लांबी - १५.३ मीटर
पंख्यांची रुंदी - १०.९ मीटर
उंची - ५.३ मीटर
उड्डाण श्रेणी - १८५० किमी
.......